Mama i yu a fayesé den aksidente kruel despues di a keda alkansá pa vehíkulo

WILLEMSTAD.- Ayera ta un di e fechanan mas ku a keda marká komo un página skur riba Kòrsou.

Un aksidente di tráfiko hopi tristu a tuma lugá kaminda un mama i su beibi di apénas 1 aña a pèrdè nan bida.

Ayera mainta trempan  alrededor di mitar di shete, Sentral di Polis a risibí informashon di un aksidente di tráfiko ku a tuma lugá na Helmin Magno Wiels Boulevard na altura di De Savaan.

Na yegada di e unidat, nan a  topa un mama i yu ku tabata gravemente leshoná. For di investigashon preliminar ku polis a realisá na e sitio, a sali na kla, ku e mama ku na e momento ei tabatin e yu den su brasa a bai krusa kaya, nèt na momentu ku un vehíkulo tabata aserkando, biniendo for di Julianadorp bayendo den direkshon di Otrobanda.

E vehíkulo aki lo mester a alkansá ámbos persona. Alrededor di mitar di ocho di mainta, dòkter di polis a konstatá morto di e mama i e yu ku a fayesé na e sitio di e aksidente.

Ta trata di: Julianne Maria Joe, nasé dia 15 di novèmber 1999 i Giun-drick Joe, nasé dia 10 di febrüari 2018, ámbos nasé  Kòrsou.

Riba òrdu di fiskal di Ministerio Públiko a konfiská e kurpanan sin bida pa mas investigashon. Siguiendo ku e investigashon polis a detené e shofùr, J.O.C., di 39 aña, i a konfiská e vehíkulo pa mas investigashon. Segun vários testigu ku tabata na e sitio ayera, e shofùr aki lo tin kustumber di kore di un forma hopi iresponsabel.

Den e kaso di ayera, e shofùr tabata kore di un forma hopi iresponsabel for di riba kaminda di Bándabou.

Personal di tráfiko ta kontinuá ku e investigashon.

 

 

 

SHARE

LEAVE A REPLY