Investigashonnan fuerte andando pa motibu ku esaki ta di 3 yu ku ta muri di e mesun situashon

WILLEMSTAD.- Ayera den oranan di anochi lat polisnan  huntu ku reshèrshi  i e tim di TFO mester a bai na un kas den área di Fuik. Ta trata di un kaso straño kaminda mama a yega haña su yu hòmber di 5 aña morto riba kama. Aparentemente e yu  a arohá promé ku el a fayesé.

E motibu dikon polisnan a bai na e kas, ta paso esaki ta di 3 yu di e mama aki ku ta fayesé den e mesun situashon. Aparentemente den tur e situashonnan aki  e mama ta bisa  di a yega haña e yu morto.

Outoridatnan a laga konfiská kurpa di e kriatura mes ora pa asina por hasi outopsia riba dje.  Maestronan di e skol kaminda e yu ta bishita den área di Janwé awe a reuní den oranan di mainta, pa despues saka un komunikado kaminda nan ta pone mayornan di otro alumnonan na altura di e suseso lamentabel aki. Na honor di e kriatura e maestronan huntu ku tur alumno a tene un minüt di silensio pa e defuntu . Polisnan ta hasiendo investigashon fuerte riba e kaso aki.

Èkstra ta ekstendé su mas sentido pésame na e famia di e hobensito aki.

Den edishon di mayan di EXTRA lo tin mas detaye.