WILLEMSTAD.- Frakshon di MAN-PIN a tuma nota ku den último añanan a invertí den drechamentu di kayanan, pero ku e parti di invershon pa peaton i usuarionan di paradanan di bùs a keda atras. E frakshon ta pidi ku pa e aña aki drechamentu i “upgrading” di paradanan di bùs haña prioridat den e trabounan ku ku ta hasi den mantenshon di mobilario di kaya.

Lider di frakshon di MAN-PIN, Giselle Mc William ta mustra ku diariamente siudadanonan ta dependé di transporte públiko pa bai trabou, skol, dòkter òf supermerkado. “Lamentablemente hopi parada di bùs ta den mal kondishon. Bankinan kibra, E para di bùs falta di protekshon kontra solo i áwaseru debí ku no tin un dak pa sinta bou di dje òf e dak ta kibrá. Tambe rondó di hopi parada di bùs ta sushi.

Esaki ta laga un mal impreshon di nos pais, segun Mc William i ta afektá no solamente siudadanonan pero tambe turistanan ku ta hasi uso di e servisio di transporte públiko. Frakshon di MAN-PIN ta proponé pa envolví Universidat Nashonal di Kòrsou (UoC) su fakultat tékniko i pa e studiantenan traha un diseño di parada di bùs di futuro. Esaki mester ta un parada di bùs práktiko, duradero i inklusivo. “Asina nos ta integrá hóbennan den desaroyo di nos infrastruktura i pais.”

Den Parlamento, frakshon di MAN-PIN ta presentá preguntanan konkreto na Minister di Tráfiko, Transporte i Planifikashon Urbano, Charles Cooper riba e tópiko aki. E frakshon ke sa kuantu parada di bùs Kòrsou tin en total, kuantu ta den kondishon apropiá pa uso públiko (dak, banki, iluminashon, siguridat), si ta eksistí un plan di mantené i renobá paradanan di bùs, i kon ta implementá esaki? Mas aleu ta puntra si e paradanan ta apto pa grandinan i hendenan ku limitashon físiko usa, ki kriterio ta usa pa determiná e lokalidat di paradanan di bùs, si ta nesesario pa re-evaluá kantidat di parada di bùs, i si minister ta dispuesto pa envolví UoC den diseño di paradanan di bùs nobo?

Frakshon di MAN-PIN ta insistí ku e tema aki ta un prioridat pa bienestar di pueblo i pa imágen di nos pais.