WILLEMSTAD.- Frakshon MAN-PIN den Parlamento di Kòrsou ta solisitá un reunion públiko urgente di Parlamento ku e Minister di Hustisia, Shalten Hato (MFK) pa trata e situashon di kriminalidat i inseguridat ku esaki ta kousa den komunidat. Kòrsou ta enfrentá un situashon preokupante di kriminalidat, kaminda atrako, robo, asesinato, uso di arma di kandela i diferente forma di violensia ta pone e trankilidat di pueblo bou di preshon. E sentimentu di inseguridat ta afektá órden públiko no solamente riba kaya, sino tambe den barionan, negoshinan i te den kas di siudadanonan, kolaboradó di frakshon di MAN-PIN, Yaël Plet ta duna di konosé.

Pa Frakshon MAN-PIN, seguridat di poblashon no por ta un asuntu di diskushon polítiko so, sino un responsabilidat primordial di gobièrnu pa, a base di maneho konkreto, tuma akshon. “Kada habitante di Kòrsou tin derecho di biba den trankilidat, sin miedu di bira víktima di kriminalidat. Na mes momento, ta importante pa haña klaridat tokante e retonan ku Kuerpo Polisial di Kòrsou ta enfrentá, manera disponibilidat di personal, outonan di patruya, material, presupuesto i otro medionan nesesario pa por garantisá un servisio polisial efektivo.”

Frakshon MAN-PIN ta di opinion ku no ta sufisiente pa presentá sifranan di kriminalidat sin duna pueblo un bista kla di e realidat ku nan ta enfrentá diariamente. Ta importante pa gobièrnu indiká kua medidanan konkreto ta implementando, kiko ta e resultadonan i kua akshonnan adishonal ta planifiká pa garantisá seguridat di nos siudadanonan. E frakshon ta konsiderá ku no por trata un tema asina importante solamente tras di porta será.

“Pueblo di Kòrsou, ku diariamente ta enfrentá e konsekuensianan di kriminalidat, tin derecho di sa kiko gobiernu ta hasi pa garantisá nan seguridat. Seguridat no ta un privilegio, sino un derecho fundamental di kada siudadano. Nos pueblo mester por kana riba kaya, traha, atendé skol, tene negoshi i drumi den nan propio kas sin miedu di bira víktima di aktonan kriminal”, Plet ta bisa mas aleu.

E ta enfatisá ku pa frakshon di MAN-PIN, a yega momento pa pasa di palabra pa akshon, di promesa pa resultado i di diskushon pa solushon konkreto. “Nos ta pidi presidente di Parlamento pa invitá minister di Hustisia na un reunion públiko mas pronto ku ta posibel, pa duna kuenta na Parlamento i pueblo di Kòrsou di e maneho i medidanan ku gobièrnu ta implementando pa kombatí kriminalidat.”