WILLEMSTAD.- Den kuadro di stimulashon di konsientisashon rondó di menstruashon, e organisashon femenino di Partido MAN -PIN ta bai organisá un kolekta den kuadro di Dia Internashonal di Higiena Menstrual dia 28 di mei próksimo.
Riba e fecha aki, mundu ta para ketu na e importansia di un bon maneho di higiena menstrual. Na Kòrsou tambe hopi hende muhé ta pasa den situashon fèrfelu òf nan ta pèrdè dia di trabou òf di skol pa motibu ku no tin sèn pa kumpra produktonan di uso pèrsonal pa su menstruashon.
Hopi hende muhé ta haña nan den e situashon ku e menstruashon ta presentá ora nan ta na trabou, skol òf un lugá públiko i nan no tin e produktonan ku nan tin mester di dje pa motibu finansiero/sosial no opstante e produkto aki ta den makutu básiko.
Den kuadro di empoderá hendenan muhé, Ala Femenino di Partido MAN-PIN ta organisá djasabra dia 25 di mei awor di 9:30’or di mainta pa 12:30’or di mèrdia un “drive thru” ku a karga e nòmber ‘Menstruashon Solidario’.
E “drive thru” ta tuma lugá na sede di Partido MAN na Rooseveltweg pa kolektá un kantidat grandi di produkto di uso pèrsonal pa menstruashon. Ta paketá i repartí tur loke kolektá pa entre otro prizòn (SDKK) i instansianan di hóben manera GOG, Casa Manita, Kas Bruder Pius i Huize Rose Pelletier pero tambe na Voedselbank. Tambe lo hasi entrega na 50 skol básiko i avansá manera a hasi ya pa 4 aña siguí kaba.
Di e manera aki Partido MAN-PIN ta kontribuí na e konsientisashon ku menstruashon no mag di kondusí na miedu, eksklushon i bèrgwensa, pa motibu ku biba ku dignidat durante menstruashon tambe ta un derecho humano i akseso na produktonan di menstruashon ta un derechi humano.
