‘Mester di solushonnan struktural awor’

WILLEMSTAD.- Kòrsou no por permití ku falta di personal, difikultat finansiero i retraso den reformanan ta sigui pone kuido i bida di hende na riesgo. Pa e motibu aki frakshon di MAN-PIN den Parlamento ta urgi gobièrnu pa bai mas leu ku reunion, karta i promesa. “Ta tempu pa presentá un plan konkreto, tuma desishonnan i implementá solushonnan ku ta duna resultado real.”

Asina lider di frakshon di MAN-PIN, Giselle Mc William ta deklará pa EXTRA. E ta referí na e echo ku siman pasá e nuebe institushonnan (“zorginstellingen”) ku ta operá den e sektor di kuido a bati alarma i a ekspresá nan preokupashon i frustrashon tokante e falta di progreso den mehorashon di salario i kondishonnan laboral sekundario di e personal di kuido. Despues di luna di deliberashon ku e minister di Salubridat Públiko, Medio Ambiente i Naturalesa (GMN), ainda no tin un solushon konkreto riba mesa.

Pa frakshon MAN-PIN e señal aki ta konfirmá loke pa hopi tempu a bin alertá riba dje, esta ku e sistema di salubridat di Kòrsou ta bou di preshon severo i mester di  intervenshon urgente, struktural. “Ta basta di plak pleister pa tapa heridanan.” Mc William ta mustra ku e nuebe institushonnan di kuido a indiká ku e “schaal”nan di salario aktual ta bieu i no ta reflehá e realidat di awe.

“E situashon aki ta sòru pa difikultat pa atraé i retené personal kalifiká. Nos profeshonal nan den kuido ta bai traha na otro paisnan manera Boneiru òf  Hulanda pa haña mihó kondishonnan laboral.” Konsekuensia di esaki ta ku Kòrsou ta pèrdè eksperensia, konosementu i kapasidat nesesario pa garantisá kuido adekuá, Mc William ta indiká mas aleu.

“Esaki no ta solamente un problema di salario. E ta un problema ku ta afektá tur e sistema. E personal ku ta keda ta enfrentá mas preshon, mas karga di trabou i frustrashon, miéntras ku pashèntnan ta dependé di un sistema ku mester por garantisá kuido na tempu i ku kalidat.”

MAN-PIN ta enfatisá ku e situashon di personal di kuido ta parti di un problema mas amplio den e sistema di salubridat. “E preshon finansiero riba Curaçao Medical Center (CMC), e listanan di espera ku ta sigui krese, operashonnan ku ta posponé, falta di personal spesialisá, i e difikultatnan ku otro institushonnan ta eksperensiando, ta indiká ku e sistema tin nesesidat di mas ku solamente solushonnan temporal. Institushonnan manera Advent, Klínika Capriles, Betèsda i otro organisashonnan di kuido tambe ta enfrentá desafionan ku ta pone preshon riba nan kapasidat pa sigui duna kuido na e poblashon.”

MAN-PIN ta konsiderá ku no ta sostenibel pa sigui atendé kada problema separá, sin un plan integral ku ta pone e nesesidatnan di e pashènt i e personal sentral. “E petishon kardinal di e nuebe institushonnan ta pa hasi un investigashon nobo di e salarionan den e sektor. For di 2018 a kuminsá papia di reformanan struktural den sektor di salubridat, pero no a realisá nada konkreto bou di e gobièrnunan di MFK for di 2021.”

Mc William ta enfatisá ku Kòrsou mester di un maneho di salubridat ku ta bai mas leu ku atendé malesa ora e presentá. “Nos mester invertí den prevenshon, promoshon di un estilo di bida salú, un kuido primario fuerte, sosten pa dòkternan di kas i un sistema di kuido ku ta mas serka di e komunidat. Tambe ta importante pa mehorá e planifikashon di personal, modernisá e sistema di registrashon i interkambio di dato, revisá e modelonan di finansiamentu i garantisá ku e tarifanan pa kuido ta sostené e kalidat i e kontinuidat di servisio.”

Pa MAN-PIN e pregunta prinsipal na e momentonan aki ta: ku ki urgensia gobièrnu lo tuma responsabilidat pa resolvé e problema. E frakshon ta reiterá ku no por trata salubridat solamente komo un gastu den presupuesto. “E ta un invershon den bida, dignidat, bienestar i futuro di nos pueblo.”

Mc William ta finalisá bisando ku e personal di kuido ta karga un responsabilidat enorme tur dia. “Nan mester haña e kondishonnan nesesario pa sigui ehersé nan trabou ku dignidat, seguridat i motivashon. Pashèntnan, na nan turno, tin derecho di haña kuido adekuá, na tempu i ku kalidat.”