WILLEMSTAD.- Mas ku 2 siman a pasa i ainda gobièrnu no a presentá ku un solushon pa e problema di holó stinki i plaga di muskita ku ta asotá i área grandi pariba ku ta kubri di Jan Luis te Beurs. E holó stinki, shushi i plaga di muskita ta okashoná pa kantidat grandi di shushi (mèst) di galiña ku ta dùmp den e área di Dam Pretu. MAN-PIN ta eksigí un solushon den 2 siman di tempu pa e situashon aki.

“No por ta asina ku abitantenan ta reklamá i minister di salubridat Públiko no ta hasi nada. Minister a bisa abitantenan pa keda trankil i ku den 2 siman lo bini ku solushon. Pero ta ki dia ta presentá ku solushon?”

Asina lider polítiko di MAN-PIN, Giselle Mc William ta trese dilanti den un komentario pa EXTRA. Den wikènt tras di lomba e tabatin kontakto ku un grupo di abitante ku a ekspresá nan desesperashon pa e situashon ku nan ta biba aden, pasobra ta dùmp di shushi di galiña. Mc William ta konstatá ku loke gobièrnu a hasi ta di solushoná un problema ku tabatin na Sunset Heigths i hiba esaki pa un otro área ku ta esun di Dam Pretu.

“E kos aki no por”, e ta bisa. Mc William ke sa tambe ta kiko tabata e motivashonnan pa a disidí pa e krea e situashon aki pa e region di Dam Pretu, ta kua estudionan a hasi promé ku e tuma e desishon aki, kiko ta e konsekuensianan pa medio ambiente, ken a duna konseho pa dùmp e shushi di galiña na e sitio aki i  te ki dia e minister responsabel ta mantené e situashon aki .

Mas aleu Mc William ta bisa ku ta pa e motibunan aki MAN-PIN ke bini ku partisipashon real den barionan. Lo instituí konsehonan di bario pa asina skucha abitantenan. “Ta basta di hasi i deshasí den barionan sin tene kuenta i sin skucha abitantenan.”

E ta kuestioná dikon ta den bario kaminda tin siudadanonan humilde ta biba gobièrnu ta hasi e kosnan aki. “No ta disidí di dùmp e shushi di galiña aki den barionan mas pudiente. E kosnan aki mester para den pais.”

Mc William komo parlamentario lo bai hasi pregunta na gobièrnu na nòmber di abitantenan haña aklarashon kiko gobièrnu ta hasiendo pa solushoná e problema ku el a okashoná pa un kantidat di bario den área di Dam Pretu. “esaki no ta manera di atendé ku pueblo, sigur no di parti un gobièrnu ku ta pretendé ku e te pa pueblo e ta di pueblo.