‘Ban duna un man durante e dianan di fiesta’

WILLEMSTAD.-  Despues di ocho edishon eksitoso di Pasku Solidario, partido MAN-PIN ta kontinuá e aña aki ku e akshon di Pasku Solidario pa aportá ku famianan den nesesidat rònt Kòrsou. “Temporada di Pasku ta sinónimo di bondat i solidaridat. Teniendo kuenta ku e situashon ekonómiko difísil ku gran parti di nos komunidat ta pasando aden, MAN-PIN ta di opinion ku nos mester saka un man pa yuda nos rumannan den nesesidat”, e partido ta bisa.

“Dor di duna un man nos ta aportá na e sentimentu di solidaridat kual ta un di e pilarnan di e ideologia di MAN-PIN.” Ta hasi un petishon na komunidat pa wikènt benidero, esta dia 30 di novèmber duna un man pa kuminsá kolektá komestibel pa rumannan den nesesidat. “Nos ke pidi kada persona, pa na momentu di hasi  kompra na nan supermerkado preferí den e dianan benidero, kòrda riba nos rumannan den nesesidat i kumpra loke ta na bo alkanse na komestibel i trese esakinan na sede di partido MAN-PIN.

Ku e produktonan kolektá lo traha paketenan di Pasku pa por parti rònt Kòrsou. Djasabra 30 di novèmber próksimo entre 9:30’or di mainta pa 12’or di mèrdia na sede di partido MAN-PIN na Rooseveltweg, lo kolektá tur komestibel. Kada persona ku ta deseá di duna un man na e edishon akí di Pasku Solidario por kontribuí ku un di e siguiente produktonan: aletria, aros, funchi, batata machiká na paki, bèrdura na bleki òf bòter, lechi na bleki, paki òf puiru, bleki di “corned beef”, paki di bakiou, bleki di tuna, saldinchi, spam, sosèshi, pindakaas, djèm, chukulati na pasta, muisjes, zeta pa kushiná, te, kòfi, chukulati na puiru, djus, kètsup, suku, salu, fruta den bleki òf bòter òf kualke otro produkto ku ta deseá.

Ta pidi pa na momentu di aportá pa paga bon tinu riba e fecha di vensementu di e produkto.