Traha ku MFK no ta un opshon

WILLEMSTAD.- Partido MAN-PIN ta den preparashon pa elekshon di 21 mart awor. Pa e motibu aki tambe no por lesa nòmber di MAN den niun di e informashonnan ku ta bai rònt riba formashon di un mayoria nobo den parlamento.

Asina kolaboradó di frakshon di partido MAN, Yael Plet ta trese dilanti na momento ku a bira konosí djárason ku a surgi un kiebro den e koalishon formá pa partidonan MFK i PNP. Plet ta haña sosten den su deklarashon di lider polítiko di partido MAN, Giselle Mc William.

Mc William ta konfirmá deklarashon di Plet bisando ku MAN no ta bai lapi niun gobièrnu i ku partido MAN ta bai elekshon na mart awor. Mas aleu e ta splika ku ora e tuma nota kon kon gabinete Pisas ta pone regla un banda pa faboresé personanan yegá na e partido, sin tene kuenta ku nesesidatnan di e pueblo, komo lider polítiko hamas e lo no duna outorisashon pa forma niun gobièrnu ku partido MFK.

Segun informashonnan ta partido KEM i miembro di parlamento independiente, Zita Jesus-Leito ta esnan ku lo djòin MFK pa forma un mayoria nobo den parlamento. Informashonnan ku parlamentario pa PNP, Corine Djaoen-Genaro tambe lo djòin e mayoria nobo no ta konfirmá

Yael Plet ta bisa ku ta den medio di komunikashon el a tuma nota di kiko a pasa de koalishon. Ounke ku e mes no tabata disponé di mas informashon di e motibunan pa e kiebro e ta bisa ku ta bisto ku e reunion di Komishon Sentral di parlamento djaluna riba eksonerashon di 3 miar na debe di impuesto a trese un divishon den gobièrnu.

“Parlamentarionan ku ta sostené e koalishon a hasi nan trabou i hasi pregunta krítiko na minister di Finansa, Javier Silvania, loke partido MFK no ta di akuerdo kuné.” Segun Plet MFK komo partido no ta aseptá si bo tin un otro opinion.

“Si bo no ta di akuerdo ku nan, nan ta trata di intimidá bo na un manera degenerá. Minister Silvania den e reunion di djaluna asta a menasá di lo saka informashon di impuesto partidonan i polítikonan. El a tira den kara di un parlamentario ku ta kabes di boto el a haña ku e ta sintá den parlamento”.

E tipo di aktitut aki segun Plet no ta loke pueblo ta deseá. “Ta un sirko tabatin den parlamento na lugá di a trata e tópiko di eksonerashon di debe di impuesto di 2017 i mas bieu na serio.”

Plet a mustra ku Konseho Sosial Ekonómiko, SER a bisa bon kla den su konseho ku minister Silvania no tabatin e outoridat pa a tuma e desishon pa duna e eksonerashon. “Ta p’esei Silvania ke bini ku un lei pa legalisá loke el a hasi na 2023 ku ta kontra lei.”

Foto:

...Yael Plet...