Promé ku reunion públiko

WILLEMSTAD.- Frakshon di partido MAN den parlamento a manda pidi por eskrito pa risibí tur dokumento relashoná ku e proseso pa yega na e desishon pa eksonerá 3 mil mion florin na debe di impuesto. Ta trata di tur konseho di Ministerio di Finansa, Ontvanger i WJZ for di 2021 te ku awe.

Lider di frakshon di MAN, Giselle Mc William den e karta ta bisa ku despues di e reunion di Komishon Sentral di parlamento dia 19 ougùstùs ku mester a warda 1 aña i 3 luna pa esaki keda reanudá, frakshon di MAN den parlamento ta konkluí ku ainda minister no por duna un klarifikashon riba e base hurídiko di eksonerashon di e grupo ku ta debe riba 1 mion florin na impuesto, ku ta kometé froude òf ku tin sèn riba un “derdenrekening”. Un eksonerashon ku a kosta pais aki mas ku 3 miar florin.

“Miéntras ku Minister Silvania a krea un inseguridat bou e siudadano, e empresario chikí ku tambe lo mester a haña eksonerashon ta den un temor pa motibu ku den e reunion minister a bisa ku no a eksonerá ningun debe di belasting. Pa por trata e reunion di reunion públiko dia 24 di sèptèmber awor di un manera efisiente, ta importante pa Parlamento risibí tur konseho di Ministerio di Finansa, Ontvanger i WJZ for di 2021 te ku awe riba e eksonerashon di 3 miar florin na impuesto”, e karta ta bisa.

Ta urgi minister pa manda e dokumentonan promé ku djabièrnè 21 di sèptèmber awor pa asina Parlamento por hasi su trabou. E reunion públiko riba e eksonerashon di debe di impuesto ta planiá pa tuma lugá dia 24 sèptèmber awor.

Foto:

...Giselle Mc William...