WILLEMSTAD.- Frakshon di partido MAN den parlamento ta hasi un apelashon riba presidente di parlamento, Charetti America-Francisca pa konvoká un reunion di Komishon Sentral pa asina e trayekto pa trata e inisiativa di lei di suèldu mínimo hubenil por kontinuá. Despues di e promé tratamentu di Komishon Sentral a traha un relato preliminar i 31 òktober último frakshon di MAN a kontestá e preguntanan di Komishon Sentral por eskrito.

“Mirando e embergadura ku e lei aki lo tin na benefisio di e hóben nos ta konvensí ku e trayekto mester kontinuá”, lider di frakshon di MAN, Giselle Mc William ta bisa den e karta. “Den e situashon difísil ku nos ta biba, kaminda dia pa dia kosto di bida ta oumentá, ta nos deber pa trata na duna pueblo un alivio.”

Promé ku parlamento kontinuá ku tratamentu di e inisiativa di lei pa trese kambio den suèldu mínimo hubenil, mester tene algun seshon tékniko ku algun stakeholder manera asosashon di Komersio i Industria, VBC, gobièrnu i sindikatonan. Asina un mayoria den parlamento a disidí for di mei último a base di un proposishon di parlamentario, David Seferina (MFK).

Frakshon di PAR tambe a bai di akuerdo ku e proposishon aki i parlamentario pa partido PAR, Ana Maria Pauletta ta bisa ku ainda no a tende di presidente di parlamento ki dia e seshon tékniko lo tuma lugá. E petishon pa e seshon aki ta riba mesa ainda, e parlamentario ta sigurá.

E inisiativa di frakshon di MAN ta enserá pa eliminá e deskriminashon den suèldu mínimo pa hóbennan di 18 i 20 aña. Nan ta gana ménos ku hóbennan di 21 aña i mas grandi. Ta paga hóbennan di 18 te ku 20 aña ménos, miéntras ku no tin diferensia den impakto di kosto di bida pa hóbennan di 18 pa 20 aña kompará ku esun di 21 aña.

Segun e lei ta aworakí  hóbennan di 18 aña gana 75 porshento di e suèldu mínimo, hóbennan di 19 aña ta gana 85 porshento i hóbennan di 20 aña ta gana 90 porshento di e suèldu mínimo. Esaki apesar ku for di 18 aña un hóben por vota, postulá su mes riba lista polítiko, kasa, saka reibeweis i no ta kai mas bou di enseñansa obligatorio, e frakshon a trese dilanti.

Asta Kódigo Sivil ta konsiderá un persona di 18 aña mayor di edat i e mester para responsabel pa tur su aktonan. Kiko ta e motibu ku e hóben di 18 aña mester gana ménos ku esun di 21 aña, frakshon di MAN ta puntra. E inisiativa di lei ta basá alabes riba prinsipionan di “International Labour Organisation” (ILO) ku tambe ta boga pa pago igual pa trabou di e mesun balor, sin importá sekso, si e persona tin un hèndikèp òf su religion.

Konforme Nashonnan Uní i tratado internashonal di derechonan di mucha tur persona bou di 18 aña ta konsiderá mucha, pues 18 aña i mas grandi no ta un mucha,  MAN ta indiká. “Asta den e ‘Europees Handvest’ ta papia di ‘young persons’ ku e último kategoria ta 18 aña bai abou. Na Aruba a kambia nan legislashon kaba i tur persona di 18 aña bai ariba ta gana mesun suèldu mínimo.”

Tambe e inisiativa ta proponé pa eliminá e diskrepansia di suèldu mínimo pa sektor manera tabata menshoná den e lei, pasobra a eliminá esaki den práktika kaba i ta aplikando e mesun suèldu mínimo den tur sektor na Kòrsou.

Foto:

...Giselle Mc William...