WILLEMSTAD.- E lokual ku tabata un soño di e siudadano Malaika Ignacio a keda kristalisá. Sra. Ignacio ke a duna un homenahe na héroenan ku ta laborá den CMC den situashon di pandemia ku ta asotá nos pueblo. El a aserka instansianan konserní i nan a bai di akuerdo pa e homenahe aki na nos héroenan den CMC, i otro sektornan vital ku ta trahando duru e momentu aki. Despues di preparashon i konsulta ku e.o CMC i Polis, trahadónan den kuido lo bai haña nan homenahe.

Mañan promé di aprel, Polis, Brantwer Kòrsou i Krus Kòrá Kòrsou lo sòru di duna un homenahe i yama danki na tur nos héroenan ku e dianan aki ta trahando inkansabel na hospital CMC.

I idea ta pa un ambulans di Krus Kòrá, Un vehíkulo Polisial i tambe un branspùit para na entrada di CMC na Colon i meskos na altura di e entrada di e Garashi di CMC  na Pater Eeuwensweg pa asina 19:55pm en punto sende sirena i lus.

Sobra di komunidat ku ta deseá pa uni na e kousa aki por para na nan kas i hasi meskos. Kompartí sea potrèt i video riba retnan sosial pa asina mundu kompletu mira kon nos dushi hendenan ta bati man pa nos héroenan den kuido.

Ku esaki sirbi komo un empuhe pa nan tur ku ta trahando inkansabel pa tur e pashèntnan infektá ku COVID-19.

Esaki tabata un soño pa hopi dia di sra. Malaika kende ta un siudadano ku un kurason grandi i ku hopi gana pa duna bèk na e komunidat di Kòrsou.