WILLEMSTAD.- Den e fin di siman ku a pasa Ministernan Steven Martina, Hensley Koeiman i sra. Zita Jesus-Leito tabata di bishita serka sr. Etty Fecunda aya na Zumbu. E mandatarionan huntu ku algun hefe di servisio i tambe kolaboradornan por a sera konosí djaserka ku e kantidat di produktonan di tera ku sr. Fecunda ta kultivando.

Por a apresiá kon di un forma ordená i ku dedikashon nan ta planta produktonan manera maishi, batata dushi, pinda, patia, pampuna, promèntè, djis pa menshoná algun. Komo prueba di esaki sr. Fecunda a regalá nan algun dje produktonan aki. Sr. Fecunda a proba ku no opstante tin hopi agrikultor ta konfrontando e problema di awa, e ta usa e loke e tin di un manera efektivo.

Riba e kombinashon di foto por mira momentunan ku e grupo ta pasa den e plantashon; i tambe momentunan ku sr. Fecunda ta splika nan un ke otro meimei di palunan di maishi. Ta di mas bisa ku e mandatarionan i nan kolaboradornan a keda impreshoná ku loke nan a mira i loke nos agrikultornan ta kapas. Si nan por konta ku awa i parti di merkado, kos lo ta mihó pa nan tambe.