WILLEMSTAD.-Minister di Hustisia, señor Quincy Girigorie ta mantené e maneho pa ku pèrmit pa artistanan internashonal por presentá na Kòrsou den e periodo di 1 di dezèmber 2018 te ku 6 di mart 2018 igual ku aña pasá.

E maneho pa e temporada aki ta hasi distinshon entre artistanan ku ta residente di un pais den Reino Hulandes i esnan estranhero. No ta permití ningun artista presentá sin ku tin un pèrmit di evenemento (‘evenementenvergunning’) pa e presentashon konserní. Petishonnan pa pèrmit di evento pa artistanan ku ta siudadano di Reino Hulandes lo keda honrá, basta nan ta kumpli ku reglanan general pa haña e pèrmit aki. Artistanan estranhero, si nan ta kumpli ku lei i reglanan vigente, lo por presentá solamente un biaha durante e periodo aki.