WILLEMSTAD.- Mundialmente esnan ku ta traha riba maneho i tambe polítikonan ta lucha un tiki kon pa definí i midi pobresa den nan pais, òf a lo ménos pa asina yega na un konsepto uniforme. Pero segun Konseho Sosial Ekonómiko (SER), loke por ta hopi útil pa yega na un definishon ku ta kuadra ku e konteksto lokal ta e siguiente tipologianan ku ta ser sostené riba dos kriterio, di kual e promé ta duna kontesta riba e pregunta: riba ki nivel e kousa di pobresa ta ser buská? E di dos kriterio ta un kontesta riba e pregunta si e kousa ta  algu interno (debe) òf eksterno (desgrasia). Asina SER ta bisa den un konseho ku el a duna resientemente na Parlamento di Kòrsou ku a entregá un proyekto di lei pa regla kombatimentu integral di pobresa na Kòrsou.

SER ta bisa mas aleu ku ta rekomendabel pa reflekshoná riba e nivelnan i índole di e kousanan for di e noshon ku pobresa no ta algu ku por ser spliká for di apénas défisitnan individual òf kontratempu. Kombatimentu di pobresa ta okupá un lugá prominente den e Sustainable Development Goals (SDG), e metanan di desaroyo duradero di Nashonnan Uní. E promé meta di SDG ta karga di nòmber “Pobresa No”. Si wak kon serka SDG lo mester atendé ku pobresa, e ta papia di kreashon di kuadronan di maneho sólido na nivel nashonal, regional i internashonal, ku ta basá riba strategianan di desaroyo i na bienestar di esnan pober i e maneho di género, pa sostené invershonnan rápido pa medio di akshonnan ku ta dirigí riba eradikashon di pobresa.

Loke ta remarkabel pa SER ta ku den ámbos kaso tin di aber ku maneho. Di un banda ta trata di programa i liñanan di maneho, i di otro banda kreashon di kuadronan di maneho sólido. SER ta suprayá e interes di formashon di maneho den kaso di kombatimentu di pobresa. Segun SER, maneho ta hunga un ròl mas grandi i efektivo ku legislashon. Pues maneho tin mas peso ku lei ora ta trata di kombatimentu di pobresa, manera a keda proponé dor di esnan ku a presentá e proyekto di lei aki.

Ta p’esei tambe na opinion di SER ta importante pa hiba un maneho di término korto, mediano i largu i asta adaptá esaki si ta nesesario.