WILLEMSTAD – Dia 22 di sèptèmber último Servisio Meteorológiko di Kòrsou a emití un informe ku debí na e fenómeno di la Niña e temporada di áwaseru (òktober te ku yanüari 2021) probablemente lo ta mas ku normal debí na e kondishonnan favorabel di atmósfera. EXTRA a bai analisá e sifra di kantidat di áwaseru ku a kai den luna di òktober 2020 komokiera ku tabata enberdat un luna basta muha i kompará esaki ku sèptèmber 2020 i òktober 2019. Tabata durante di e luna tras di lomba ku tabatin algun dia ku mal tempu kombiná hopi bientu i áwaseru ku asta a kobra bida di un piskadó ku a hoga na Playa Piskadó.

Den e resúmen di Meteo pa loke ta luna di òktober 2020 por nota ku a midi 56.4 mm di áwaseru durante henter e luna. E dia ku mas awa a kai tabata 21 di òktober, 11.4 mm. Tabatin 10 dia ku tabatin 1 mm òf mas di áwaseru. Pa aña 2020 te ku fin di òktober a kai nèt no 300 mm. Si kompará e 56.4 mm di awa ku a kai luna pasa ku sèptèmber 2020, 20.7 mm, por nota un diferensia basta grandi. Pues manera Meteo a pronostiká e fin di aña aki lo ta unu ku mas áwaseru. Un otro komparashon ta òktober 2019 ku un total di 30.7 mm di awa a kai.

Otro punto interesante ta ku na luna di òktober 2020 e dia mas kalor tabata 13 di òktober pa 11:45 am ora ku a midi 35.6 grado. Eksaktamente un siman despues dia 20 di òktober pa 4:21 pm a midi e dia mas friu, 23.3 grado.

Manera a indiká kaba Meteo a bisa ku na luna di sèptèmber por a konfirmá ku la Niña a bira un realidat. Alrededor di kada 5 pa 7 aña e temperatura di e superfisie di laman den e área aki ta bira relativamente mas kalor (ta karga nòmber di el Niño) òf mas friu (la Niña). Estudio realisá na Servisio Meteorológiko ta indiká ku durante di un la Niña e temporada di áwaseru ku tur probabilidat por ta mas ku normal debí na e kondishonnan favorabel di atmósfera.

Esaki ta e tabèl ku Meteo a publiká ki ora, basa riba kantidat di awa ku a kai si tabata un luna seku, normal òf muha.

Meteo ta kalkulá ku e probabilidat pa temporada aki ta alrededor di 60-80% pa un temporada mas ku normal ku alrededor di 400-530 mm total. Esaki ta 10-40 % mas ku un temporada promedio (366 mm).