WILLEMSTAD.- Basta hende a duna oido na e yamada di dirigentenan sindikal pa subi kaya awe djamars 19 di febrüari, den e protesta e.o kontra intenshon di gabinete Rhuggenaath pa duna yudansa humanitario na Venezuela. Tin un grupo a reuní na Plasa Brion i kana bai Wilhelminapark pa despues pa reuní dilanti edifisio di Parlamento den Punda. Na sede di sindikato ABVO tambe tin un otro grupo den protesta kontra intenshon di gobièrnu pa kòrta den benefisionan di ámtenarnan.

Den Punda na altura di edifisio di Parlamento por a tuma nota di algun dirigente di e sindikatonan PWFC, STU, e sentral sindikal CGTC i otronan. Áwaseru a muha e manifestantenan un poko, pero tabata nèt pa freska e ambiente manera nan mes a indiká.

E reunion di Parlamento originalmente a keda yamá pa mainta, pero presidensia di Staten huntu ku polis a konsiderá pa manda e reunion pa despues di mèrdia, esta 2’or debí ku den oranan di mainta lo no tabatin sufisiente polis pa mantenshon di òrdu den sala di Parlamento. Presidente di Parlamento William Millerson a bai para pafó i a konfirmá na esnan den protesta ku e reunion a kambia di orario i ta kuminsá 2’or.

Mes ora un polis presente a splika e grupo pa tene kuenta ku tin espasio pa solamente 40 persona den tribuna, ademas esnan ku drenta mester ta desente bistí i no por hasi bochincha ni sikiera hari sakando zonido pasobra esei ta motibu pa ekspulshon di e tribuna Públiko mesora. E manifestantenan a nota presensia di parlamentario Plet (MAN) pero mesora a indiká ku nan no ke skucha niun parlamentario papia nada. Mas detaye den edishon di EXTRA.