WILLEMSTAD.-Manera EXTRA a informá un ratu pasá minister Steven Martina a Sali un reunion i den áwaseru a bai topa ku e manifestantenan ku a bai su ofisina na edifisio di MEO na Parera. Den kombersashon ku e mandatario el a bisa EXTRA ku e ta respetá e libertat pa tene manifestashon semper enkuando e no ta stroba órden públiko. Den e kaso aki e manifestashon ta relashoná ku preis i kalidat di kombustibel.

Komo minister ku tin e parti di tarifa di kombustibel den su portafolio el a haña informashon di polis pa e bai risibí un karta serka e manifestantenan, i pa motibu di rèspèt i duna oido el a disidí di bai tuma e karta.

Minister Martina ta bisa ku el a keda sorprendí ku ora el a yega pa tuma e karta direpente el a tende ku ta te 12’or di mèrdia nan ke entrega e karta na su persona. E minister a haña e forma di proseder aki hopi straño i asta un falta di rèspèt, i ora ei el a bai i e ta keda pendiente di e karta ku nan lo ke entrega.

Pa lokual ta trata kalidat di kombustibel el a indiká ku por laga hasi un análisis, dor di un instansha imparsial, di e proseso ku mester garantisá kalidat di kombustibel pa komprobá e kalidat di kombustibel i tambe wak si tin posibel mehorashon posibel di e proseso.

Pa lokual ta trata preis di kombustibel, ta asina ku a revisá e maneho i na e momentonan aki no tin motibu pa kambio di maneho. Esaki ta enserá ku kada luna por tin subida òf bahada di preis di kombustibel di akuerdo ku fluktuashon di preis di krudo riba merkado internashonal.

 

Update:Manifestantenan ta eksigí representante den komishon regulashon

WILLEMSTAD.-Manifestantenan a risibí minister Steven Martina den áwaseru i a splika ku nan ta konsiderá ku e oumentu di preis di gasolin i gasoil ta inhustu, i na di dos lugá nan a trese reklamo serka e minister riba e kalidat di e produktonan menshoná. Nan a proponé pa entrega minister Martina un karta 12’or di mèrdia i riba esaki e minister a proponé pa entrega e karta na dje for di e momentu ei ya ku e no sa si pa mèrdia e por bolbe topa ku e manifestantenan.

E manifestantenan a bisa minister ku nan ke mira un persona den representashon di pueblo, den e komishon di regulashon, tambe a pidi pa haña e posibilidat di saka muestra for di tankinan di Curoil pa laga hasi propio investigashon pa sa di e gasolin ta kumpli ku e kalidat ku gobièrnu ta preskribí.

Minister Martina a bisa ku luna pasá el a laga hasi investigashon pa wak si por intervení den preis, e kontesta tabata ku na e momentunan aki no tin motibu pa trese kambio den e maneho ei. E minister a pidi pa kaba di papia, pero no a permití e mandatario di kaba su splikashon. P’esei manifestantenan ta eksigí pa haña un hende di pueblo den e komishon di regulashon.

 

Manifestantenan kontra oumentu preis gasolin a bai serka minister

WILLEMSTAD.-Un grupo di shofùr di bus i otro manifestantenan a subi kaya pa protesta kontra e oumentu di preis di gasolin. Manera EXTRA a informá kaba, Giovannie Decaster di sindikato STO a bisa ku nan a haña mandato di nan miembronan pa uni forsa na e akshonnan ku tin plania awe. E akshon aki lo konta ku shofùrnan di bus, taksistanan, e asosiashon di vehíkulonan pisá, Transporte di muchanan di skol i vários otro mas. Awe mainta e grupo a bai den direkshon di ofisina di minister enkargá ku Desaroyo Ekonómiko Steven Martina. Áwaseru no a stroba e manifestantenan. Polis a papia ku e grupo tratando pa kontrolá e situashon pa nada no sali for di man.

LAGA UN KOMENTARIO

Please enter your comment!
Please enter your name here