WILLEMSTAD.- Marechaussee ta investigando un situashon ku a surgi siman pasá entre un siudadano riba un skuter i tambe un militar di CURMIL di kazèrne na Suffisant.
E insidente a tuma lugá djárason siman pasá den Kaya Havana. Segun e siudadano a konta ku e tabata biniendo riba su skuter riba e kaya en kuestion, un militar ku tabata huntu ku algun kolega i tabata pará na un minimarket, a kana bai riba kaya i na momentu ku e tabata pasa, lo a saka pia skòp e for di riba e skuter. Konsekuensia di esaki su skuter a bai dal den un vehíkulo ku tabata kore su dilanti. No solamente esei, pero e siudadano a resultá bastante herida. El a indiká di a kibra su kakunbein, lepnan kòrtá, herida na su wowo i esaki hasta ta será; leshonnan grave na su man i den su pechu, i el a kibra pal’i nanishi.
E siudadano a keda un dia den CMC pa tratamentu i despues e por a bai kas. El a indiká di a duna keho na polis dje insidente.
Tambe tin un vidio ku por wak riba retnan sosial, kaminda e militar di CURMIL ta bai para den kaminda i ta mané bai riba e skuter ku ta pasa, e militar aki mes ta kai abou i despues ta lanta para bèk riba pia.
Manera indiká e denunsia ku e siudadano a hasi a yega na despacho di defensa. Manera ta e kaso usual ora tin un kaso hudisial ku tin di aber ku militarnan, ta Marechaussee ta hasi investigashon i den e kaso aki tambe.