Arma ilegal na Kòrsou ta un problema grandi; akshon pa entregá arma; For di 2019 tabatin krímen di e índole aki

WILLEMSTAD.- Polis a duna informashon relashoná ku e kaso di asesinato ayera nochi lat pa awe mardugá.  Polis huntu ku Ministerio Públiko tabata presente.  Den kareda di 17 minüt pa 12 tabatin atrako brutal den kas di famia na Reigerweg ku konsekuensia fatal. Raymond Ellis i fiskal mayó Heiko de Jongh tabata presente.

Raymond Ellis a trese dilanti den su introdukshon ku ayera nochi polis a haña yamada ku na adrès den Reigerweg bisiñanan a tende un dama grita pa yudansa. A manda polis na e sitio i einan a topa ku personal di ambulans ta trata un víktima maskulino ku a haña tiru. A sali na kla ku e hòmber tabata sinta den balkon patras di kas ku su pareha ora a tende zonido. E hòmber a lanta bai wak i e dama a tende tiru. Despues e dama a keda sorprendé pa 3 hòmber den e kas, un ku kara tapa i hanskun a bin riba dje. Bou menasa ku arma e hòmbernan a obligá e dama pa entrega sèn i yabi di outo, un Chevorlet modèl Beat koló oraño numerá B/36-0. Nan a buska den e kas i despues a bandoná e kas ku e outo, Personal di ambulans a purba reanimá,pero sin resultado deseá. Na  e kas mes dòkter di polis a konstatá morto di e hòmber Antonius Johannes Maria Hendrika Brood nase na Hulanda di 49.

Sr Ellis a konta ku riba e mesun dia aki e persona aki tabata serka dje na kantor pa papia kon pa drecha e parti di frontera di nos pais. E tabata na Kòrsou den kuadro pa reforsá kuerpo polisial pa kontrol di frontera.

Polis ta konsiderá e kaso aki serio i brutal mirando ku e último kaso di e índole aki a tuma lugá for di mei 2019. “Nos no ta permití ni aseptá e situashonnan aki den komunidat. Si tin hende tin informashon yama polis na 917 òf na 108 e liña anónimo” Raymond Ellis a bisa. Tambe el a indiká ku a kaba di haña e outo. E no por a duna muchu detaye.

Ellis a bisa ku lo bai hasi uso di tur hèrmènt i esfuerso pa solushoná e kaso aki. Tambe el a bisa ku Ulanda a ofresé pa nan yuda den e investigashon. I si den sierto materia nan no tin, nan lo hasi uso di e posibilidat aki.

Parse ku den pasado lo tabatin ladronisia na e kas aki pero pa atrako ta promé bia esaki ta sosodé.

Heiko de Jong fiskal mayó a bisa di su parti ku e investigashon ta kanando. E tipo di insidente aki ta indiká ku nos tin problema ku arma ilegal na Kòrsou. Mester hasi algu den kooperashon ku ACOC kaminda tin tur partner i algun luna lo kuminsá ku kampaña kontra arma ilegal i kaminda kisas un akshon di entrega di arma. Banda di esei tin na Staten pa subi e kastigu pa poseshon di arma ilegal. Mester kita mas tantu arma for di kaya i e hendenan ku ta kana kuné lo mester haña kastigu pisa. Tambe sr de Jongh a menshoná ku nan tin aparato nobo na polis ku por identifiká arma ku ta hasi un investigashon aki mas fásil. Komunidat kompleto mester traha na un korsou mas seif.