WILLEMSTAD.- Tin un dicho ku ta bisa: “Danki di mundu ta pishi di yewa”. Pues bo ta hasi bon pa un hende i despues ta paga bo ku malu òf ser malagradesí. Asina Marilyn Alcala-Walle a sinti su mes awor ku el a ser denunsiá i ser persiguí penalmente despues ku el a hasi hopi trabou boluntario pa rekreá ku otronan i yuda otronan. Den e kaso aki hendenan ku mente maligno den komunidat no a para ketu na loke el a hasi bon sino a buska un buraku den lei pa bisa ku e tabatin konflikto di interes na momentu ku el a bira minister.

T’asina ku ayera mainta durante tratamentu dje kaso kontra Alcala-Wallé pa violashon di lei di integridat i falsifikashon, el a mustra ku un dje tareanan boluntario ku el hasi ku hopi dedikashon i orguyo ta yudansa na studiantenan ku tabatin problema ku pago di nan fiansa di estudio na DUO. Esaki a algu ku el a hasi den e periodo di 2012-2015. Su fundashon a yuda algun shen studiante ku atraves di tempu a bin kai den problema finansiero grandi pa motibu ku nan no por a paga DUO ora ku nan a kaba nan estudio.

Dado momentu e problemanan tabata yega te serka deurwaarder ku tabata pone beslag i pone ku nan debenan tabata akumulá sin ta mira salida. Pero deurwaardernan tampoko tabata informá studiantenan di nan derechonan p.e. ku nan por a pidi dispensashon i ku nan por a haña ‘rentebrief’ pa dedusí un ke otro for di impuesto. Asina por bisa ku atraves di tempu asta a bini studiantenan di Aruba i St. Maarten aserka, i nan a yega mas ku 800. Su siguiente paso tabata di hasi kontakto ku e minister di enseñansa Hulandes dje tempu ei kende a bai di akuerdo ku un fórmula pa a trese alivio pa studiantenan den nan pago na DUO.

Lei di Deurwaarder:

Un di dos proyekto ku Fundashon Marilyn Alcala-Wallé a okupá su mes despues kuné tabata di traha riba un proyekto di lei pa trese reglamentashon i legislashon den e trabou di deurwaarder.

A traha riba e proyekto di lei i asina huntu ku studiantenan el a entregá esaki na Parlamento pa tratamentu.

Segun e akusado, dado momentu ku el a ser aserká pa bira minister el a distansiá su mes dje aktividatnan pero pa medio di un karta. E no a mira e nesesidat di likidá e fundashon, ya ku despues di tempu e lo por a rebibá e aktividatnan fásilmente sin tin mester di bolbe kana e trayekto di lanta otro fundashon. Pero e no a pensa tampoko ku pa motibu ku e no a likidá e fundashon, e lo hañ’é dilanti mesa bèrdè. No opstante esei e ta kontentu di a yuda hopi studiante.

E mesun kos e lo por bisa di Road Runners Club di kual e tabata presidente pa hopi aña. Na momentu ku el a bira minister el a distansiá su mes. E no por a kita su nòmber fo’i niun kaminda pa motibu ku dado momentu no tabatin reunion di direktiva mas, no tabatin muchu ánimo. Pero 9 biaha pa aña nan tabata organisá kaminata si, ku ta algu rekreativo.

Awor pa tur e kosnan bon ku el a hasi aki tin hendenan ku mente maligno ku a bai hasi denunsia djis pasobra nan a mira un buraku den e lei di integridat, dor ku e no a kita su nòmber òf likidá e fundashon na Kámara di Komersio. Den e kasonan ei e no a mira ku tabatin konflikto di interes. “Mi ta ser kastigá pa hasi kos bon”, asina el a finalisá bisando.