WILLEMSTAD.-Informashon ku a yega mesa di redakshon di EXTRA i ku a keda konfirmá pa famia ta indiká ku ir. Mario Evertsz a fayesé. E ta na Hulanda pa algun tempu kaba. Último añanan malesa a pone ku Mañon, manera su amigunan tabata yam’é, no tabata den e kapasidat di hiba un bida normal mas. Mario Evertsz a bai na edat di 80 aña.

Nos ta kòrda Mario Evertsz for di Ogem, e kompania di distribushon di awa i koriente ku despues a bira Kodela i despues a bira Aqualectra Distribution. Ogem a konosé kambionan grandi den e tempu aya, hopi profeshonal hóben bou di guia di Evertsz a sòru pa transformashon grandi den kompanianan na Kòrsou.

Mario a bai manehá Dok Maatschappij. E astiero, komo kompania di gobièrnu tabata pasando momentunan difísil. Bou di maneho di Mario Everstz a sera un kombenio ku e astiero di Cuba. Esei tabata forma parti di un maneho stratégiko pa Kòrsou i Cuba uni forsa. Tabatin e periodo ku Mario a manehá ALM ku despues a bira DCA. ALM tabata den situashon finansiero difísil i den añanan nobenta gobièrnu a disidí ku mihó sera ALM. A sera ALM i habri DCA pero esaki tambe no a sobrebibí e.o despues di bai e guera di kuminsá bula pa Hulanda. Effective Management Group (EMG) tabata e kompania bou di kua Mario Evertsz i su tim di hóbennan profeshonal tabata brinda servisio na Kòrsou i internashonalmente. Forsa na famia i ku Mañon sosegá na pas.