WILLEMSTAD.- Curaçao Marriott Beach Resort lo bai tin un kara kompletamente nobo i ta programa pa habri dia 18 di sèptèmber próksimo i ku un toke realmente Karibense, i e meta i deseo di gerensia dje kompania aki ta pa empleá mas tantu hende lokal ku ta posibel. Asina e Gerente General nobo di e hotèl ku pronto lo bai habri su portanan a duna di konosé ayera durante e konferensia anual di CHATA. T’asina ku sr. Craig Martin, ku konosé e merkado Karibense hopi bon, tabata un dje oradornan invitá di CHATA e mainta aki el a duna un presentashon i splikashon kon e hotèl nobo lo bini i kiko t’e fasilidatnan ku lo bai ofresé.

En prinsipio a bisa ku e hotèl lo bai den un periodo di renobashon, pero e por bisa ku defakto Curaçao Marriott Beach Resort a bai den un proseso di total rekonstrukshon, pasobra aparte di a konstruí kambernan aserka i bai algun piso mas ariba, a disidí di renobá i rekonstruí kada kamber di pia te kabes, pues e lo sali ku un kara kompletamente fresku i nobo.

E hotèl lo bini ku un total di 336 kamber, di kual 8 suite, 184 kamber ku ‘king’ i 144 kamber ku ‘double queen’. Por sierto, e kambernan ta di tal manera konstruí ku nan lo habri ku bista pa laman.

I no solamente e kambernan lo ta nobo, sino e edifisio, e hotèl mes lo tin un kara nobo, ku pintura nobo, ku por ehèmpel un lobi kompletamente habrí ku ta tira ku kara pa laman. Lo tin restorant ku fasilidatnan pa akomodá un grupo di 150, ku bufèt kantu di playa. E mesun restorant aki lo ser kambiá pa por akomodá bishitantenan den un otro tipo di ambiente den anochi. Pa amplia e tim di shèfnan di Marriott, a disidí di kontratá un shèfkòk ku tabata empleá na St. Maarten. Ta trata aki di un profeshonal ku pa motibunan di orkan Irma a keda desempleá. Kòrsou lo bai disfrutá di su konosementu den kushina.

Mas aleu tambe sr. Martin a splika ku ilustrashon kon e restorant i klup di VIP lo bini, ku mobilarionan spesialmente importá for di Portugal pero ku toke kompletamente Karibense. Lo bai tin un ballroom kompletamente nobo tambe ku fasilidatnan pa akomodá 400 persona.

Aparte di e pisina eksistente, a instalá un di dos pisina, i tin un ‘fitness center’ i tambe un spa den tapara.

Segun sr. Martin, e ta sumamente satisfecho i kontentu ku e proyekto den su totalidat i ta spera ku esaki lo tin un balor agregá pa turismo di Kòrsou. E ta un persona ku konosé loke tin di ofresé den e industria aki den region di Karibe, ya ku el a habri i fungi komo gerente den vários hotèl grandi i renombrá den Karibe, aunke e mes ta oriundo di Florida.