WILLEMSTAD.- Hotèl Marriott lo no habri mas dia 21 di òktober manera tabata planeá, pero algun siman despues.

EXTRA a risibí algun komentario di preokupashon di siudadanonan ku a hasi nan reservashon kaba na Hotel Marriott abase di e kampaña ku tin andando. Ta trata di un kampaña entre Marriott i Fun Miles, kaminda klientenan por usa nan Fun Miles i haña un kamber na preis promoshonal. Pero e klientenan ta preokupá ora nan a tuma nota ku e hotèl ta leu for di keda kla.

“Ayera nos tabata na Mombaa Beach banda di Marriott. E beach ta patras di Eks Hilton i bisiña di Marriott.  Durante e dia nos a tira un bista na e Marriott nobo ku ta habri 21 òktober pa kliente.

Nos mes a buk un kamber fin di òktober”, tabata reakshon ku EXTRA a risibí serka siudadanonan preokupá.

Pero nan a spanta masha, e hotèl ta leu fo’i kla. Un "bouwput masha grandi" ainda, nada rondó di área di e pisina ta kla pa risibí kliente pronto. E playa ta un desaster ainda. Despues di 3 ana di konstrukshon, esaki ta e resultado 2 siman promé ku apertura”. Un bèrgwensa total ! Funmiles i Marriott ta propaganda un spesial fo’i 21 òktober, pues hende lokal mag di paga i bini i drumi i "relax" den un progreso di konstrukshon total i enorme. Den e atvertensia niun hende a papia over esaki”, e reakshon di siudadanonan ta sigui.

Pero tambe nan a tende ku maneho di Marriott no ta kontentu ku e progreso di konstrukshon i e kalidat di trabou.

Di e maneho EXTRA a komprondé ku e apertura di e hotèl ta dependé di algun faktor ku no ta den nan man. Pa fin di òktober kuminsamentu di novèmber lo bisa e fecha presis ki dia e hotèl lo habri. Pero esaki lo ta sigur e aña aki, esaki EXTRA a komprondé for di bosero di e manehadónan nobo di Marriott hotel.