WILLEMSTAD.- Parlamentario pa partido KEM, Michelangelo ‘Low’ Martines a firma un karta di retiro komo miembro di parlamento. Esaki tabata posibel despues ku djamars 12 novèmber a saka Martines for di “beperking” (limitashon).
Direktiva di partido KEM a reuní djamars anochi mes riba e desishon di Martines pa entregá su retiro. E proseso ku lo sigui ta enserá ku ta entregá e karta di retiro na presidente di parlamento ku na su turno lo informá Konseho Supremo Elektoral.
Den seno di direktiva di KEM a deliberá, den un reunion di djamars anochi, mas aleu riba ken ta bai drenta Parlamento pa KEM na lugá di Martines. Number 2 riba lista di kandidato pa elekshon na 2021 ta Anthony Godett ku ta aktual kolaboradó di frakshon.
A disidí ku lo sigui ku e sekuensia normal di lista loke ta enserá ku Godett ta na turno pa bira parlamentario pa KEM miéntras ku Martines ta atendé ku su kaso. Martines ta detené riba sospecho di trafikashon di droga i labamentu di plaka.
Den kaso ku Martines rekobrá su libertat promé ku elekshon e lo ta bèk den parlamento pa KEM. Sinembargo pa aworakí ta pendiente pues kon lihé Konseho Supremo Elektoral lo por traha riba kredensialnan di Godett pa manda esakinan parlamento.
Den un reunion públiko, parlamento lo verifiká e kredensialnan pa despues Godett por hura dilanti gobernadó. Ku esaki e proseso pa hura ministernan nobo tambe por kontinuá.
Kandidatonan pa minister ta Jason Fullinck (KEM) i Raymond Jamanika pa miembro independiente di parlamento, Zita Jesus-Leito.
Jean chundro
E Parlamento aktual di korsow ta”welcome”esunnan ku a hanja sentensia di justisia i ku a bai sera pa korupshon ku man habri. Más korupto bo ta , parlamento su porta ta hanchu habri pa bo drenta. E sobra parlamentarionan ku no a bai sera of ku no ta korupto, nan tambe ta komplise pa traha ku koruptonan. Nan Ta papia so , no ta hasi ningún denunsia kontra kolega ku e sa ta korupto i ta laba man di otro. Parlamento aktual ta tur bruha. Mester bin un limpiesa profundo ei den. Tur den Parlamento no ta di konfia.