WILLEMSTAD.-  Den e huisio sumario ku direktor di SSC a entamá ayera kontra di hunta di komisario  en konekshon ku su suspenshon, abogado ku a representá e instituto mr. Achim Henriquez a trese vários kos dilanti.

Segun e abogado e motibu di suspenshon di e direktor ta pa entre otro mal maneho den atministrashon , divulgashon di sekresia di trabou i tambe intimidashon di trahadó.

Segun e abogado  na aña 2012/2013 Sra. Marvelyne Wiels a bin kore “stazje” na Kòrsou den SSC i  na final a haña un suspenshon di 66 mil florin. Tur esaki bou di maneho di Sra. De Freitas.

Abogado di Sra. De Freitas mr. Nagelmakers a bisa ku Sra. Wiels a hasi un tremendo trabou den SSC dor di duna training nan na e studiantenan i ku e pago  a keda aprobá pa hunta di komisario i ku esaki no tabata un sekreto.

Tambe e mr. Henriquez a bisa ku ku  tin un proyekto di un software ku a keda fundá, kaminda hóbennan  ta interkambiá ku otro, di kual esaki a kosta mas di 70 mil euro, pero ku direpente a stòp ku esaki.

E abogado a duna di konosé mas aleu ku e proyekto “Devolving Funds” ta spesial pa generá plaka pa studiantenan por sigui haña finansiamentu i no pa hasi kosnan leuk kuné.

Segun e abogado mas aleu ku  SSC tin un pay roll di 325 mil florin pa luna.

Esaki despues ku e kantidat di empleadonan a subi enormemente bou di maneho di Sra. De Freitas.

Tambe e abogado a papia di un kantidat di 400 mil florin ku ta bai na coachnan i guianan na Merka.

Pa loke ta trata e kòmpiuter i telefòn, e abogado no ta haña ku esaki mester keda debolb’é na Sra. De Freitas, pa motibu ku e ta bisa ku ta trata aki di  propiedatnan di SSC.

Segun e abogado, presensia di Sra De Freitas ta indeseabel na SSC na e momentonan aki.