WILLEMSTAD - Kontinuando ku investigashon relashoná ku un kaso di ladronisia ku violensia kometé dia 22 ougùstùs último, polis a tene kuater (4) entrada hudisial.

Djaluna 7 di sèptèmber 2020 alrededor di 05.00 or di mardugá, personal di Tim di Atrako primeramenta a tene entrada hudisial den un kas na Nilda Pintostraat.

Durante investigashon na e kas en kestion, polis a haña i konfiská un arma di kandela i algun artíkulo ku ta di importansia pa e investigashon.

Na e sitio a detené e sospechoso M.R.M.L., di 28 aña di edat nasé na Kòrsou. Relashoná ku e detenshon aki e agentenan a bai na un adrès na Hydraweg pa un investigashon.

Seguidamente e agentenan a bai na otro adrès na Kaya Hector P. Curiel, despues di un kontròl na e kas a detené e hòmber J.W.A., nasé na Kòrsou di 28 aña di edat. Durante di e investigashon na e kas a haña i konfiská algun artíkulo ku ta di importansia pa e investigashon.

Despues e agentenan a dirigí nan mes na un kas na Seru Frances. Aki tambe durante di un kontròl a haña i konfiská un telefòn selular ku probablemente ta prosedente di atrako. Polis a detené un sospechoso na e kas pa kumpra kos hòrtá. Ta trata di e hòmber sospechoso R.A.M., di 35 aña di edat nasé na Kòrsou.

A presentá tur e sospechosonan dilanti di un fiskal ouksiliar ku a ordená nan enkarselamentu, pendiente di mas investigashon.