WILLEMSTAD.- Den aña 2019 e mulina ku ta atendé ku entradanan di belasting a generá no ménos ku 1.435 miar florin pa kaha di gobièrnu. Esaki tabata un di e añanan di mas entrada di impuesto pa kaha di gobièrnu. Esei por konkluí for di e relato anual di Fundashon BAB. Refiriendo na e entradanan di belasting, BAB a bisa ku den e aña en kuestion profeshonalismo disiplina i integridat tabata sentral den e reflekshon pa ku supervishon di BAB. Tabata un aña yen di reto pa e entidatnan fiskal i tambe pa ekonomia di Kòrsou. No opstante e retonan ei, oumento di e kumplimentu ku e obligashonnan di impuesto pa por tabatin mas entrada di belasting a keda un meta importante den 2019.

Si analisá e gráfiko pa loke ta entradanan di belasting for di aña 2003 te ku 2019, por bisa ku e entradanan a konosé subida, i asta for di 2009 por a papia di un stabilidat rònt di 1.4 miar pa aña. Sin tene kuenta ku sifranan di belasting di sushi i derecho di pèrmit, por bisa ku e loke a drenta den kaha di gobièrnu na 2019 tabata di 1.435.794.952 florin.

Mayor di Kriansa:

Segun e relato di BAB, banda dje esfuersonan pa kumpli ku e metanan di BAB, tin atenshon tambe pa situashonnan fèrfelu den komunidat.

BAB den koperashon ku boluntarionan a organisá un aktividat pa rekoudá fondo pa Fundashon Mayor di Kriansa, ku e meta pa yuda un kantidat di 150 mucha ménos pudiente, pa asina nan por a kuminsá aña eskolar ku tur artíkulo nobo pa skol.

Deporte:

E envolvimentu sosial di BAB a ser ekspresá tambe pa medio di su kontribushon na aktividatnan deportivo riba Kòrsou. E filosofia ta ku, dor di hasi sufisiente deporte i move, e chèns pa kehonan ku salú ta bira ménos. Dor di esaki e porsentahe di hende malu den servisio ta keda abou tambe.

Ta asina ku deporte no ta solamente salú pa bo kurpa, sino tambe pa bo mente, i asina e empleadonan lo por konsentrá mihó i duna un mihó prestashon tambe. Empleadonan di BAB regularmente sa partisipá den torneonan den diferente ramo di deporte.

Mèldu malu:

Segun BAB, den 2019 kompará ku 2018 tabatin un oumento chikí den mèldu malu na trabou. Tabata un oumento di apénas 0,09%, pero gerensia ta orguyoso di e personal i e resultadonan.

Esaki ta prueba dje dedikashon di e personal pa kumpli ku e ophetivonan denter dje organisashon.