WILLEMSTAD.- Ku e sifranan di ayera konosí nos ta yega na 6015 tèst ku a keda hasi di djaweps siman pasa pa djáweps e siman aki i di kual e resultadonan ta konosí.

Manera ta konosí, ayera e resultado tabata 224 kaso positivo ku ta pone e kantidat total di personana positivo ku Covid-19 yega na 1642 kaso.

Esaki ta un sifra espantoso den un tempu asina kòrtiku ku e kantidat di positifnan awor ta subiendo ku asta mas di 200 pa dia.

Tambe nos a tuma nota ku e laboratorionan ku nos a pasa ayera tabatin basta hende pa tèst. Tur laboratorio na Kòrsou ta tèst pa Covid-19. ADC a habri e fasilidat di un tèst pafó na Palu Blanku kaminda por tèst sinta den outo. E fila di outo na e laboratorio di ADC na Palu Blanku tabata basta largu.

Un ku tambe ta hala atenshon na LabdeMed na Cas Coraweg. Einan a pone tènt i stul pafó pa e klientenan por sinta warda nan bùrt. E rei aki tambe ta largu manera por mira riba e fotonan.

Segun EXTRA su informashonnan,un kambio den e situashon di Covid aktual ta ku tin diferente mucha ku tambe ta kontagia. Nan ta basta, ounke no por bisa presis kuantu ya ku e sifranan no ta spesifiká esaki.

A CMC tambe ya tin algun dia ku a habri e tènt hospital pafó preparando pa si tin mester di us’e.

Te ku ayera tabatin 50 persona interná den CMC, Ayera so a interná 12 di kua 2 a bai Kuido Intensivo. Total tin 14 persona den kuido intensivo. I esaki ekskluyendo dos persona hospitalisá di Boneiru i un den kuido intensivo di Boneiru.