WILLEMSTAD.- E barku Hulandes di marina, Zr. Ms. Groningen,ku na e momentunan aki ta nabegá pa Wardakosta di Caribe Ulandes, den e anochi di 13 pa 14 di yüli a interseptá un transporte di droga. Na parti sur di Kòrsou e barku di marina  den un tempu rèkòrt a sa di para e go-fast.

Zr. Ms. Groningen i su tripulante nobo nèt a kaba un trayekto intensivo di training i ta tin djis un par di ora patruya atrobe. Pues e mesun dia ku nan a kaba ku na training ku éksito, nan a haña nan promé éksito operashonal.

Wardakosta a deskubrí e go-fast riba kua Zr.Ms. Gronigen i e helikòpter di wardakosta a wòrdu despachá mesora dor di e Centro di Operashon Marítimo (MOC). Ku e lansamentu di e dos botonan rápido di e Groninger, e asina yamá FRISC’s, pa forsa e go-fast pa para. E tripulashon a ninga di para despues di kua a lòs tiru di atvertensia pa final e motornan a wòrdu disabilitá. Banda di e 5 tripulante i e droga a haña 4 arma di kandela abordo. Un Metal Shark di Wardakosta a tuma e tripulante, e droga i e armanan for di e Groningen i a trese nan na e Punto di Sosten na Parera.

E sospechosonan i e kontrabanda a wòrdu entregá na Kuerpo di Polis di Kòrsou ku lo kontinuá ku e investigashon.