WILLEMSTAD.- E tim di GMN enkabesá pa dr. Izzy Gerstenbluth ta sintiendo e nesesidat pa mas hende. Tin un falta di personal den e departamento aki i komo tal gobièrnu a habri e posibilidat pa solisitut pa por djòin e tim. Por bisa ku mas di 800 hende a reakshoná riba e solisitut aki. Asina Minister di Salubridat, Medioambiente i Naturalesa, sra. Zita Jesus-Leito, a duna di konosé durante un enkuentro ku prensa ayera tardi. T’asina ku último tempu tin hopi hende ta reklamando tardansa den e sistema di aserkamentu, kontròl i monitoreo di parti di GMN, i e ministerio ta rekonosé esaki, i e tin di aber ku e kantidat eksplosivo di chekeo i infekshon ku ta konstatando den komunidat.

Segun sra. Jesus-Leito, gobièrnu ta tumando nota dje kantidat di kasonan den komunidat. No solamente e tin di opservá e kantidat di kaso ku a subi sino tambe por mira un kantidat di kaso bou di personal den hospital i tambe den sentronan di kuido. I loke ta preokupante di esaki ta ku ta trata di hendenan den kuido ku t’ei netamente pa por duna e servisio na esnan ku tin mas mester di dje.

Pero ta duna èkstra guia i atenshon na e grupo di trahadónan aki pa protehá nan mes, nan koleganan i esnan ku nan ta kuida. Komo minister di salubridat el a mustra ku e situashon aki tin di aber ku sufisiente personal ora ku tin hende infektá ku tin di keda ousente. Esaki ta trese kuné ku tin tiki hende pa duna kuido.

Un otro peliger ta ku, dor di konsentrá riba kasonan di COVID-19 ta keda ménos rekurso pa e kuido regular. Esaki ta bira un reto pa e kuido regular. E mandatario a bolbe hasi un apelashon riba komunidat pa ser responsabel i protehá nos mes i nos hendenan, partikularmente nos grandinan.

Tardansa:

Segun e minister, e tin di rekonosé ku últimamente por tuma hopi tempu pa un hende haña su resultado, òf pa GMN tene kontakto ku nan pa hasi ‘contact tracing’. E sa ku aktualmente tin un retraso, pero esei tin di aber ku e falta di personal.

Den e mesun rosea el a splika ku e tim di GMN ta den e proseso pa siña mas hende pa yuda aliviá e situashon. Gobièrnu a saka avisonan pa buska mas hende, i por bisa ku mas di 800 hende a reakshoná. Miéntras tantu ta reforsando e departamento aki ku e personal rekerí i pronto e grupo nobo lo bai forma parti di e tim.

Dje forma aki lo hasi posibel ku tur hende ku hasi un tèst lo por haña un kontesta mas pronto posibel.