Hóbennan ta usa mas alkohòl ku vape/sigaria

WILLEMSTAD.- Fundashon pa Maneho di Adikshon (FMA) komo e sentro di konosementu riba tereno di prevenshon, tratamentu i kuido pa ku adikshon, a haña un bista riba uso di supstansia (droga i alkohòl) bou di hóbennan di Kòrsou.

A base di un enkuesta FMA a logra haña e informashon nesesario.

Di 369 hóben bou di 25 aña ku a partisipá na e enkuesta ku a tuma lugá di yüni 2023 te ku sèptèmber 2023 a sali lo siguiente;

• 
  

• E supstansia mas usá bou di nos hóbennan ta alkohòl, siguí pa vape/ sigaria elektróniko.

• 
  

• E porsentahe di hende muhé ku ta usa alkohòl ta mas haltu kompará ku e porsentahe di e hende hòmber.

• 
  

• 33% di e personanan ku ta usa mariwana a indiká di ta hasi esaki pa por dil mas mihó ku nan emoshonnan i situashonnan di bida.

• 
  

• Uso di vape ta mas popular ku uso di sigaria bou di hóbennan.

• 
  

• Aproksimadamente 7,5% di e personanan ku ta usa vape tin probablemente un problemátika di uso di vape.

• 
  

Mester ta kuidadoso ku mira e grupo komo representativo pa tur nos hóbennan na Kòrsou komo ku no a kontrolá pa sierto faktornan promé ku a hasi e enkuesta.

Pero segun FMA e resultado ta duna un indikashon si pa loke ta pasando den nos komunidat bou di nos hóbennan. Teniendo na kuenta ku Kòrsou ta konosí komo un pais ku tin hopi kaso di personanan ku ta sufri di preshon haltu, problemanan di kurason i otro kehonan di salú, ta bon pa gobernantenan pone mas énfasis riba e protekshon di nos hóbennan dor di limitá akseso na supstansianan adiktivo pa e grupo aki, alabes mara e benta na sierto leinan i kontrolá ku e leinan ta keda apliká manera mester ta.