Polis, VKC i milisia antiano den kontrol for di awe nochi

WILLEMSTAD.-Dr.Izzy Gerstenbluth den konferensia di prensa a duna di konosé ku den último dianan por a nota ku riba sierto dianan e kantidat di hendenan infektá a subi bastante. Na algun okashon tabatin dianan kaminda a registrá mas ku 20 i mas ku 27 hende ku a keda kontagiá. Gerstenbluth ta bisa ku e tim di epidemiologia a detektá ku ta durante di sierto aktividatnan un kantidat di hende a kontagiá ku e vírus.

E epidemiólogo a splika mas aleu ku e dos aktividatnan aki ta entiero i eventonan sosial na kas i na trabou. Entiero ta algu emoshonal kaminda hendenan ta brasa otro i tur hende ta mas serka di otro. No tin atenshon pa distansia sosial i asina ta plama e vírus. Den eventonan sosial na kas i na trabou meskos. Tur hende ta lubidá e reglanan di higiena i distansia sosial. Ta pa esei a bisa ku mester limitá e kantidat di hende na entiero, ta p’esei a tuma medida di prekoushon, no ta pasobra e tim no tin kurason ni nada di eseinan. Den e tipo di aktividat ei ta hopi fásil ta pasa e vírus di un pa hopi hende.

Gerstenbluth a enfatisá ku kada hende ku ta sinti un síntoma pa keda den kas i evitá di yega serka asta di hendenan den kas. No kome ku otro famia si ta sinti síntoma di Covid. Bisti tapa boka mas tantu posibel.

Minister di hustisia Quincy Girigorie a duna di konosé ku ti un grupo grandi di hende den komunidat ku ta kumpli ku e reglanan i ta evitá aglomerashon, pero meskos tin otronan ku no ta kumpli ku niun regla. Pa motibu di e hendenan ku no ta tene nan mes na regla ta pone ku no por de-eskala e medidanan. Sinembargo no por kastigá hinter e komunidat pa falta di e grupo ku ta keda organisá eventonan i aktua di forma iresponsabel. Outoridatnan ta bai focus riba esnan iresponsabel. Entrante awe djabièrnè anochi lo tin polis, VKC i milisia antiano riba kaya pa tene kontrol severo riba lugánan. Ta hasi un apelashon riba komunidat pa yama na momentu ku mira ku hendenan ta aktuando di forma iresponsabel.