WILLEMSTAD.- Siman pasá a bolbe lanta kabes algun di e desaroyonan ku a tuma lugá den e instituto Bureau Ziektekostenvoorziening (BZV) algun tempu pasá. Esaki na momentu ku korte a trata e ‘regiezitting’ den e kaso ‘Dubnium’ konosí komo ‘mondkapjes’. Investigashon ku EXTRA a realisá ta mustra ku lo tin mas ku 1 mion florin na ekipo ku lo ta kla pa bai landfill, di e proyekto Medi-Card ku BZV a kuminsá traha riba dje.

Dokumentunan na disposishon di EXTRA ta mustra ku e proyekto Medi-Card lo mester a sirbi pa duna BZV i SVB mihó kontròl kiko ta pasando den salubridat. Na Kòrsou meskos ku hopi otro parti di mundu, gastunan den salubridat ta krese fuertemente. Kada dòkter i tur botika lo tabatin e mashinnan di Medi-Card di manera ku e pashènt ta swaip ora e bai dòkter i ora di tuma remedi òf kualke otro servisio ku BZV i SVB ta kubri komo seguro médiko.

E invershon den e ekiponan a kosta komunidat di Kòrsou hopi plaka, pero manera indiká tur lo ta para kla pa bai landfill. Ta bon pa splika ku a stòp e proyekto Medi-Card na òktober 2011 i pa esaki mester a paga e kompania ku tabata enkargá ku e proyekto mei mion florin (Fl 500.000,-), sinembargo na febrüari 2012 BZV a disidí na sigui ku e proyekto atrobe i a duna enkargo na otro kompania pa hasi esaki. No a buska tres oferta, simplemente a duna enkargo na un otro kompania. A paga e kompania nobo aki 40% di loke ta nesesario pa atendé e proyekto, despues na ougùstùs di 2012 a bolbe paga 40% mas i na desèmber 2012 a paga 10% mas. E mashinnan di Medi-Card ku lo ta kla pa bai landfill ta paresido na esaki.