Kuminda na speshal no ta yega ni pa kubri gastunan básiko!

WILLEMSTAD.-Si Covid no kousa morto pa salu e ta kousa ku hopi famia no por kome, di e forma aki un empresario lokal doño di tres restorant a reakshoná serka EXTRA. Pa awe djárason ya kaba nan mester a skrap 250 reservashon ku kompanianan a hasi pa kome ku grupo chikí di empleado. Ora pa ora e situashon ta bira mas serio i banda di esei e loke ta hasi mas doló ta e inhustisia ku ta trata ku e sektor di horeca, asina el a sigui bisa.

Restorantnan ta tene nan mes estriktamente na reglanan impone pa gobieru den kuadro di e medidanan pa kontené plamamentu di Korona vírus. Den kombersashon ku EXTRA algun empresario a mustra kon turistanan a drenta nan restorant ayera i puntra dikon nan por bebe den hotèl si i den un restorant pega ku hotèl no por. Pa kolmo bar na playa si por ofresé alkohòl i e restorant si no por. Tin turista ku a bisa ku nan ta kambia nan pasashi pa bai bek nan pais pasobra tantu na Ulanda komo na Merka e situashon ta otro.

Pa dañonan di restorant e sensashon di inkapasidat kontra e situashon ta algu horibel. E doñonan a splika ku ta danki na  e benta di bebida alkohóliko ku nan ta gana un poko mas debí ku benta di kuminda so no ta kubri ni 35% di nan gastunan. Nan ta mustra komprenshon pa leinan ku gobièrnu ke introdusí pa protekshon di bida di hende, p’esei ta mas aseptabel si lei seku konta pa tur kaminda i no pa algun so.

Nan propio análisis ta mustra ku kisas 0.01% di hende na Kòrsou a keda kontagiá den un restorant sinembargo tòg ta pone e reglanan mas pisa pa restorant.

Den área di Janthiel e sentronan ta yen tur dia i nan si por sigui bende alkohòl miéntras ku restorantnan den aranan komun i koriente si no por. Nan ta mira ku gobièrnu ta permití pa komunidat bai kana keiru den lugánan manera hardware ku ta será den èrko, pero ta matando horeca.