Mas ku 55.000 yamada riba e promé dia di registrashon

WILLEMSTAD.- Un kantidat basta respetá di siudadanonan na Korsou a registrá kaba pa risibí e bakuna kontra Corona vírus. Djabièrnè último a kuminsá ku registrashon i a sigui djasabra tambe. Hendenan por a yama for di mainta te atardi pa registrá i lógikamente riba e promé dia, esta Djabièrnè e kantidat di yamadanan tabata hopi. E sistema e registrá 55701 yamada, naturalmente tin hende ku a yama na hopi okashon. E reakshonnan ta hopi asina Maharo Isenia direktor di e direktorado di komunikashon di gobièrnu a informa EXTRA.

Manera indiká e registrashon a kuminsá Djabièrnè i riba e dia ei a registrá 816 persona ku ta bini na remarke pa haña e bakuna. Djasabra e registrashon a sigui i riba e dia ei a registrá 1808 persona mas. Djadumingu no tabatin registrashon. Pues entre Djabièrnè i djasabra a registrá 2624 hende. A tuma tur informashon importante di e personanan aki i mesora nan a haña tende ki dia i ki ora nan ta risibí e promé bakuna i tambe ki dia nan ta risibí e di dos bakuna.

Na e momentu ku un hende yama no ta atendé solamente ki dia e ta risibí pero tambe sierto aspektonan importante manera si e ta sufri di malesanan króniko i si ta hende desabilitá ta lag’e bai Ana Paviljoen na Sehos unda ta mas fásil aksesibel pa esnan ku desabilidat físiko.

Isenia a sigui splika ku por yama di djaluna pa djasabra pa registrá miéntras ku ta bakuná hende di djaluna te ku djadumingu.

Algu ku EXTRA mester hasi menshon di dje ta ku Korsou a haña 18720 bakuna for di Ulanda, pero no ta Korsou ta disidí kuantu dosis di e bakuna ta risibí. Esaki ta pone ku mester kontrolá i manehá e kantidat di hende ku ta haña e bakuna. Kòrda ku kada hende mester haña un dosis na e promé okashon i despues un di dos dosis na un siguiente okashon. Mas detaye den edishon di EXTRA.