WILLEMSTAD.- Sekretario di estado pa Relashon di reino Raymond Knops a informá parlamento hulandes ayera, durante tratamentu di presupuesto di Reino, ta ku empeño Hulanda ta yuda Kòrsou den e krísis di COVID-19. Knops a bisa ku situashon den paisnan i islanan Karibense di Reino Hulandes ta hopi difísil. ‘For di e momentu ku krísis di Corona a kuminsá, e islanan a realisá kiko ta nifiká si no tin niun turista mas pa por bishitá e islanan. I ku komo konsekuensia no tin entrada mas for di sektor di turismo.’ Asina Knops a bisa den reunion di parlamento hulandes ayera. Segun Knops den e último luna e islanan a realisá ku nan ta hopi vulnerabel. ‘Hopi hende awor ta sin trabou i sin entrada.’ Segun Knops mas ku binti porshento di famianan riba e islanan ta dependé di yudansa di nesesario di kuminda. ‘Na Kòrsou ta trata di mas ku 33.000 di e total di 156.000 persona. Na Aruba ta trata di 24.000 persona. I na Sint Maarten ta trata di 13.000 persona.’ Segun Knops tin hopi doló skondí na e islanan. El a bisa ku abitante di e islanan ta hendenan orguyoso. ‘Pero si bo ta bishitá nan den nan kas, bo ta mira e konsekuensia di e situashon aktual.’
El a bisa ku tin famianan grandi, ku ta biba ku diferente generashon. I awor durante krísis di Corona ta dependé di salario di un miembro di famia so. Tambe el a enfatisá ku tin hopi hóben riba e islanan ku no tin trabou.
Knops a bisa ku for di momentu ku krísis di Corona a kuminsá riba e islanan, Hulanda a duna yudansa. Knops: ‘Hulanda a duna yudansa di emergensia i yudansa médiko te fin di aña. Despues nos ta wak kiko ta nesesario. Pasobra komo Hulanda nos ta konvensí ku niun abitante di Reino Hulandes por bira víktima di e situashon.’ Segun Knops e yudansa te ainda no ta nada mas ku pone pleister. ‘Na nos opinion ta mihó si nos invertí den e ekonomianan. Si nos ta duna perspektiva pa e abitantenan.’ Segun Knops te ainda e ta deliberá ku e gobièrnunan di e paisnan tokante esaki.