WILLEMSTAD.- Ofisialmente Kòrsou a djòin i start ku e trayekto di  bakunashon riba e ruta pa un dia por yega na e bida normal bèk. Ayera den presensia di prensa lokal pero tambe ku henter komunidat mirando via di medionan sosial, gobièrnu di Kòrsou a start ku kuminsá bakuná e promé personanan den komunidat. Meskos ku esei ta e kaso den kasi tur pais, nos mandatarionan a duna e ehèmpel dor di pasa e bakuna. Den e kaso aki nos Promé Minister sr. Eugene Rhuggenaath i tambe Minister di Salubridat sra. Zita Jesus-Leito, pero tambe dr. Izzy Gerstenbluth tabata e proménan pa ofisialmente tuma e bakuna. For di informashonnan ku a bini den e enkuentro ku prensa ku a sigui despues EXTRA por a komprondé ku mas di 4.000 siudadano a registrá kaba na telefòn number 9345 pa ser bakuná, kual ta surpasando e espektativa di outoridatnan lokal.

Durante e promé seshon di bakunashon aki tin vários otro personahe konosí den komunidat ku a opta pa duna e ehèmpel. Meimei di nan tabatin sra. Lisa Dindial, Dinah Veeris, diferente dòkter dòkter lokal, pero tambe siudadanonan komun.

T’asina ku nos a komprondé ku un persona ta risibí su bakuna na e sentro di bakunashon na SEHOS, pero promé ku e bai kas e lo tin di sinta den un kamber spesial un warda un 15 minüt pa wak si e ta reakshoná bon riba e bakuna aki. Es mas, e lo tin di haña un sita mas pa e di dos parti dje bakunashon, ya ku e bakuna di Pfizer ta konsistí den dos parti.

Segun EXTRA a komprondé for di enkuentro ku prensa, ne momentunan aki i pa un periodo determiná lo duna prioridat pa bakuná gruponan di riesgo, ku ta e.o. e grupo di 60+, tambe e personal den promé liña di kuido.

Riba nos pregunta, si lo tene kuenta ku personanan ku ta na kas i no por akudí na e sentro di bakunashon, nos a komprondé ku a tene kuenta debidamente ku esnan na kas, pero, ku lo duna mas informashon al respekto. Dr. Jerry Semper ku ta na kabes i ta kordiná un ke otro a splika tambe ku en prinsipio lo pasa e angua na brasa. Pa motibunan di  efisiensia lo no pasa esaki na otro partinan di kurpa, aunke esei den e mundu médiko semper ta posibel.

Despues di e enkuentro ku prensa a sigui un rekorido den e parti ku lo ser usá komo e sentro di bakunashon. Profeshonalnan riba e tereno aki a ekspresá nan optimismo pa ku e reakshon i disponibilidat di pueblo pa risibí e bakuna pa asina por bai bèk na e bida normal un dia.