WILLEMSTAD.- Te ainda un grupo di persona na Kòrsou no ta di akuerdo ku trayekto di vakunashon kontra COVID-19. Sierto iglesia na Kòrsou ta konsehá hendenan pa no vakuná. Segun gobièrnu tur hende ta liber pa tuma nan desishon, pero nan ta pidi mas hende ku ta posibel pa bai vakuná. Esaki, segun gobièrnu, ta e úniko manera pa dominá e vírus di COVID-19. Manera ta konosí Iglesia Katóliko no ta kontra vakunashon, sierto otro iglesia ta konsehá hende pa no tuma vakuna pa motibunan religioso.
Dr Jerry Semper komo médiko ta kordiná henter e proseso di vakunashon na Kòrsou, a bisa ku hendenan di religion i hendenan di siensia no mester ta kontra di otro. El a bisa ku pa hopi tempu siensia i religion tin diferente opinion riba sierto tópiko. ‘Pero awor ta un bon momento pa nos traha huntu. Pasobra e vakuna ei, papa Dios mes a duna nos e sabiduria pa trah’é. Ta papa Dios a duna tur dòkter sabiduria pa yuda e pashèntnan. Mi ta kere ku lo ta hopi bon ku nos por haña un diálogo entre médiko sientífiko i iglesia.’
Mas aleu Semper a bisa: ‘Echo ta ku mas ku 500 mion hende a vakuná na mundu kaba. Niun hende a muri di e vakuna ainda. Hopi hende a muri despues ku nan a tuma e vakuna. Meskos ku hopi a fayesé despues di bai pela tambe. No ta pa bagatelisá, pero nan a fayesé pa otro kos. No pa motibu di e vakuna.’
Semper a hasi un yamada na iglesianan ‘pa laga nos sinta i papia i ‘brainstorm’ tokante esaki.’ El a bisa ku e tin un pastor komo pashènt. ‘E ta bisa ku nos ta hasi un bon trabou. No ta tur iglesia ta kontra vakunashon. P’esei mi ta bisa e lo ta bon si nos habri un diálogo ku nan. Por ta via Asosashon di dòkternan di kas di Kòrsou òf e Asosiashon di spesialista médiko di Kòrsou. Segun Semper ‘e kos ta interes di nos tur. Pasobra nos no por keda hasi kos manera ántes. Nos tin ku respetá, komprondé, duna balor na otro pensamentu i kompartí. Na final di dia nos ta kai bou di mesun Reino di mesun Dios.’
frida
Ami no ta kontra vakunashon.Pero ku Dr. Semper ta tribi di bisa ku di e 500 miyon hende ku a vakuna,NIUN hende no a muri di e vakuna,esei si ta gewoon un flagrante mentira. E ta parse Rutte ku ta ganja tur ora. Ta parse ku e ganjamentu ta birando tambe un pandemia.Dr.Semper, bisa hende ku den mayoria di kaso, no ta tin problema pa e vakunashon i hende ta hanja protekshon,maske ku ta pa tempo indetewrmina.Pero tin hende ku ta hanja vervelende bijwerkingen te ku hende a fayese a konsekuensia di e vakuna. Laga kada ken tene su mes na e maatregelen hopi na serio i tambe ku kada ken ta disidi si e ta tuma e vaccine. Den bida tur kos ta tin risiko i kisas un hende por muri despues di pela manera Dr.Semper ta bisa.Pero Por fabor lesa e rapportnan di otro paisnan i no keda papia kos ku bo ta sa ku no ta yuda.Papia berdat i mayoria di hende tog ta bai tuma e vaccine.Si bo ta ganja,ningun hende ta bai tumele. I bo no ta mas ku un dokter,bo no ta Dios pa bisa asina sigur ku ni un hende a muri.
Kenneth
Frida Bin ku bo datonan i asina nos por kompara