...Mester kubri gastunan èkstra di CRU tambe...

WILLEMSTAD.- Na aprel awor ta bini otro rekargo riba kombustibel pa yuda kubri gastunan di Curaçao Refinery Utilities (CRU). Asina promé minister Eugene Rhuggenaath ta bisa den medionan di komunikashon.

E promé rekargo di 2.3 sèn tin di aber ku kombustibel ku e kompania Curoil mester importá pa CRU. Pero CRU mes tambe tin gastunan adishonal i esei ta bini den un di dos rekargo ku ta drenta na vigor na aprel awor.

E rekargo riba kombustibel pa yuda kubri gastu adishonal pa Curoil i CRU no ta un medida manera e medidanan di aña pasá pa subi entrada pa gobièrnu. E sèn aki no ta bini den kaha di gobièrnu, di akuerdo ku Rhuggenaath.

Manera direktor interino di Refineria di Kòrsou (RdK), Marcelino ‘Chonky’ Delannoy a splika ampliamente durante un konferenssha di prensa siman pasá, e gastunan èkstra aki ta pa un periodo di 6 luna i a plama e gastunan aki riba 4 aña. Ta trata di por ehèmpel gastunan èkstra di seguro i mantenshon di tanki.