WILLEMSTAD.-Tur kos ta indiká ku mas spesialista médiko lo opta pa stòp di traha entrante yanüari 2021, asina EXTRA a komprondé papiando ku e profeshonalnan den e sektor. Na oktober último a diskutí e punto di “productieplafond” ku ta limitá e kantidat di tareanan ku kada spesialista médiko por realisá pa aña i awor a bini aserka e parti ku spesialistanan mester paga nan parti pa uso di fasilidatnan di Curaçao Medical Center. Ta bon pa splika aserka ku esaki ta konta solamente pa spesialistanan ku no ta den servisio di CMC.

For di momentu ku hospital a hasi  partisipashon na spesialistanan esaki no a kai den bon tera. Den pasado tabata asina ku ta SVB ta kubri e gastunan aki, awendia ku kòrtamentu di gastu tur kaminda a resultá ku SVB no ta kubri e gastu ei mas pa e spesialistanan pero nan mes mester kubri e gastunan.

Hospital ta reklutando spesialistanan pa traha den e instituto, por ehèmpel pa loke ta trata ginekólogonan por a komprondé ku tin sufisiente den CMC. Mayoria ortopédiko i siruhano tambe ta den servisio di CMC kaba, pa loke ta trata urólogonan e informashon ta ku ainda CMC no a logra pa haña niun den servisio miéntras ku esnan lokal ta bahando ku penshun. Tin indikashon ku lo a buska 3 kandidato for di Colombia.

E preokupashon den e sektor ta keda biba i awor ta ekspresando preokupashon ku CMC komo instituto semi gubernamental ta kuminsá duna señal di preokupashon den sentido ku no tin transparensia, no tin kuenta anual, no tin businesscase ainda i no tin prosedura di solisitut habrí.