WILLEMSTAD.- Hospital nobo, Curaçao Medical Center (CMC) a selebrá nan promé aniversario ayera djadumingu 15 di novèmber. Un di e aspektonan ku den simannan tras di lomba a hunga un ròl ta ubikashon di spesialistanan den CMC. Ta trata di un maneho ku ta data for di tempu di eks minister Jacinta Constansia. Den kuadro di kontrolá gastunan den salubridat gobièrnu di Kòrsou ke introdusí un sistema kaminda mayoria di spesialista ta den servisio di CMC.

Den kombersashon ku eks minister di Salubridat Suzanne Camelia-Romer el a duna di konosé ku mas spesialista lo nifiká ku ta baha e lista di espera. Pa vários disiplina e pashènt mester warda hopi luna promé ku haña un sita, anto ora ta trata un pashènt sigurá pa SVB e ta pió. E eks minister ta konvensí, meskos ku otronan promé kuné, ku mas spesialista lo yuda pa baha e lista di espera sin ku esei ta subi e gastu. CMC por pèrkurá pa trese mas spesialista médiko ku ta traha den hospital i duna e kuido nesesario na pashèntnan. Esei sigur ta un maneho na fabor di hinter komunidat.