WILLEMSTAD.- Ayera pa di tantísimo biaha outoridatnan a haña un vehíkulo prosedente di ladronisia. E biaha aki tabata den área di dam di Muizenberg ku malechornan a laga un vehíkulo, Kia Picanto koló blanku despues di a hòrta esaki.

A kita basta piesa afó promé ku a laga e vehíkulo bandoná atras. Ku yudansa di un kran a konfiská loke a sobra di e vehíkulo i a transportá esaki pa warda di polis pendiente mas investigashon.

Ta remarkabel kon robo di vehíkulo a lanta kabes muchu mas durante último simannan. Awor ta praktikamente tur dia outoridatnan ta haña vehíkulonan prosedente di ladronisia ku ta keda plumá.

Anteriormente polis a manda mensahe den komunidat indikando ku nan ta konsiente di e kantidat haltu di ladronisia di outo i e forma di operá awor ku ta mas tantu dal glas di outo kibra. Polis a duna diferente rekomendashon pa tene kuenta kuné manera;

Tin mihó iluminashon, ménos vegetashon, porta di kurá tabatin un bon kadena i kandal apropiá.

Tambe tin hopi siudadano ku tin un kurá den kua nan por stashoná nan outo di manera ku nan por skucha mas lihé ora tin moveshon, sea pa flohera òf negligensia ta opta pa laga e outo keda para pafó di kurá riba kaya.

Ta rekomendabel tambe pa klèm portanan di kurá ku ta skùif, ya ku esakinan na hopi okashon fásilmente ta wòrdu saká for di riel i asina fasilitá e baimentu ku e vehíkulo.

Tin kasonan ku doñonan di outo ta laga nan remote di porta di kurá den outo, koperando asina inkonsientemente ku e malechor.