WILLEMSTAD.- Tin diferente grupo di kontratista ta limpiando aki i aya, mata, yerba i palunan ku a krese enpartikular den roinan. Pero e trabou ta hopi. Mas ainda ku áwaseru kayendo, e matanan ku asina tantu set a rèk rápidamente for di suela i bai laira.

Un bunita bista sigur, pero tin hopi ta estorbo pa tráfiko.

Nos a tuma nota na e krusada di Schottegatweg Nort i Winston Churchillweg, e matanan a krese bira palunan grandi i no tin visibilidat pa outomobilista di un banda pa e otro. Si esun ta para na e lusnan riba Schottegatweg Nort direkshon pa ost, nan no ta mira e tráfiko ku ta Sali for di Winston Churchillweg,. Asta e warda di polis na Rio Canario ta wak djis un punta. E outonan tin di asta hala poko afó, kasi bai riba e otro ban di kaminda.

Nos a sigui kore i na e krusada di Punta Cardonweg na e skina ku SDDK tin un buraku asina grandi ku fásilmente por kousa daño na vehíkulonan. Djis un tiki mas den Punta Cardonweg i tambe Muizenberg si nos a nota ku tin trabounan di limpiesa a tuma lugá. Por wak kon e roinan ta limpi bek.

Nos a sigui kore i yegando na Fokkerweg ta otro situashon di palu ku a krese i ta tapando e lus di trabou. Nos a sigui subi Schottegatweg zùit tambe matanan grandi a krese mei mei, kousando peliger pa tráfiko.

Atenshon pa e situashonnan aki!