WILLEMSTAD.-Esaki ta e situashon di e riol entre edifisio di korte, ántes KMPG, i tambe e edifisio di loke tabata Martina Plumbing. Esaki ta e kaya ku ta konektá kaminda Sentro Pro Arte ku Kaya Don Martina(Nieuwehaven). Diariamente masha hopi outomobilista ta hasi uso di e kaya aki ku ta fungi hopi bon pa konektá sea ku Nieuwehaven òf ku Schottegatweg ost.

Despues di un temporada hopi largu di sekura Kòrsou a haña un tiki áwaseru i tur loke ta mata shimaron a krese mesora. Den situashon normal Selikor ta paga kontratistanan pa tene sierto áreanan limpi, pero manera e kompania a indiká nan no tin sèn, debí ku nan tambe no ta haña loke ta toka na nan. Tabatin un tempu ku ta hasi apelashon riba prizòn pa laga prezunan bai kap palunan i limpia sierto áreanan manera esaki, pero pa un òf otro motibu esei tampoko no ta sosodé mas.

Den poko palabra e matanan di mondi a krese i a bira un peliger pa tráfiko. Ademas dos outo por a kore na ámbos banda di e kaminda, pero esei no por mas debí ku e matanan ta tira brasa hopi riba kaya. Na un banda di e roi tin Korte i na  otro banda tin e empresa E-zone. Kisas entre e dosnan aki i otronan ku ta rondoná por sera un fondo pa kubri e gastunan di limpiesa di e roi aki?