WILLEMSTAD.- Banko Sentral awor si tin un gerensia ofisial ku ta konsistí di sra. Leila Matroos-Lasten RA i dr. Jose Jardim. Ámbos a presta huramentu ayera serka su ekselensia gobernador di Kòrsou sra., Lucille George-Wout.

Sra. Matroos-Lasten a hura komo direktor-sekretario miéntras ku sr. Jardim a hura komo direktor finansiero-ekonómiko di Banko Sentral di Kòrsou i St.Maarten. E direktornan mester huramentá dilanti di gobernador di Kòrsou i esun di St.Maarten komo e dos paisnan ku e banko sentral ta pertenesé na dje.

Otro siman dia 20 di febrüari e direktornan lo presta huramentu serka su ekselensia gobernador di St.Maarten Eugene Holiday pa kompletá nan nombramentu. Tantu sra. Matroos-Lasten komo Jardim ta okupá e puestonan di direktor komo interino for di novèmber 2017. Banko Sentral ta spera di por haña un presidente dentro di poko.