WILLEMSTAD.- Mavis Albertina, direktora di e planta di televishon Nos Pais Television, a outo-proklamá su mes komo e defensor di esnan den komunidat ku ta sinti nan mes trapá dor di sierto forsa òf personanan. Albertina a bin ta hiba un lucha tenas kontra di UTS pa motibu ku sistemátikamente esaki ta saka su televishon for di aire, esei djis pa motibu ku for di un prinsipio na 2014 ku el a disidí di kuminsá ku e planta di televishon aki el a habri su boka i reklamá kosnan ku e tabatin derechi riba dje i reklamá inhustisia. Segun Albertina muchu hopi biaha hendenan den komunidat ta mira nan derechinan ser trapá.

Anto esaki ta algu ku ta ser hasí dor di henter un kadena. Den kaso ku esun no logra su meta, e mensahe lo bai pa un otro amigu den e kadena ku ta hasi otro intento. Mavis, konosí komo un hende muhé ku no a kai riba su boka, a kulpa e direktor di UTS, Paul de Geus, pa e situashonnan fèrfelu ku su planta a pasa aden. No opstante UTS ta un kompania gigante ku tur fasilidat pa por paga un grupo di abogado, el a sa di gana su kaso, pasobra korte a konstatá ku tabatin inhustisia ora ku na prinsipio di aña pa di tantísimo biaha a saka su televishon for di aire.

Tin un grupo di hende den e komunidat aki ku ta nan ta disidí riba hopi kos, i nan ta hasi tur loke ta posibel pa no kita for di e posishon ku nan ta. Ta nan ta disidí riba bo futuro, si bo ta keda eksistí òf no. Mira kiko a pasa tambe ku e kompania Citex.

Tin hopi hende ku a aserk’é ku sierto testimonio pero hopi di nan ta preferá di keda ketu pa motibu dje temor pa represaya. Pero segun Albertina, e no tin miedu, e por sali papia, e tin e fasilidatnan pa hasi esei. Tin asta trahadó i eks trahadónan di UTS ku a divulgá di kosnan ku ta sosodé ei den, pero nan no por habri nan boka. Por sierto, nan no por komprondé mes kon bini Albertina a disidí di bai korte ku UTS. I awor ku el a gana nan ta premirá ku e problemanan lo bira aun mas serio.

Pero segun Albertina, e no tin miedu, pasobra hendenan mas pió ku de Geus mes el a pone para ketu. El a hasi un apelashon riba tur esnan ku ta sinti nan mes ultrahá i trapá, laga p’e ta nan bos. Esnan ku pa un òf otro motibu no ke bini dilanti, nan por bini serka dje ku nan kaso i e lo ta nan bos. “Ami a sali pa bosnan, konta ken ku e ke, anto riba loke sea”, asina Albertina a deklará di un manera indigná. Abusu den e pais aki mester kaba! “Niun hende no ta abusá di mi hendenan mas”.