WILLEMSTAD – Despues ku na sèptèmber di 2016, e pèrmit pa konstrukshon pa e di dos megapir a keda entrega na e kontratista ku lo bai ta enkargá ku e konstrukshon, mayan porfin lo bai tin “groundbreaking” pa e dos Megapir Tula. Esaki lo ta na enkargo di Minister di Economia Sr. Eugenne Rhuggenaath.

Aña pasa den presensia di ministernan Susy Camelia Römer i Eugene Rhuggenaath i direktor di Curaçao Port Authorities Humberto de Castro a hasi entrega di e pèrmit. E plan tabata pa e pir keda kla den último kuartal di 2017. Manera ya ta konosí e pir lo bai karga e nòmber di Tula Pier.

Na promé instante e konstrukshon di e terminal di cruise nobo lo mester a kuminsá na novèmber 2016. Manera a keda anunsiá na vários okashon kaba den prensa e di dos megapir lo bin den e área di e Mega-Pir aktual.

Dia a anunsiá e proyekto aki a informá ku esaki lo bai kosta 43 mion dòler. A skohe e sitio ei komo ku barkunan di turista ta bira dia pa dia mas grandi i nan no por mara den haf mas. Ademas tin kapitannan ku no ta riska drenta haf di Kòrsou ku nan barku.

Segun un eksperto den e sektor aki, e interes pa Kòrsou ta kresiendo. Hopi kompania di barku ta buska destinashonnan nobo. Kòrsou su posishon geográfiko ta hopi bon i ta bin aserka ku Kòrsou ta skor bon serka turistanan di cruise. Pa kompanianan ta atraktivo pa añadí Kòrsou den nan skèdjel”, asina el a bisa.

E proyekto di konstrukshon di un pir nobo ta kai bou di enkargo di CPA. E minister di ekonomia i turismo Eugene Rhuggenaath a anunsiá despues ku el a asumí e posishon ku lo aselerá e proyekto di un pir nobo komo un di e maneranan pa duna Kòrsou un impulso ekonómiko nobo. E plan di un pir nobo ta algu ku ta diskutiendo riba dje pa algun aña kaba, inkluso bou di e gerensia anterior di CPA.