WILLEMSTAD.- Te ainda ta parse ku no ta hopi hulandes a bai kas bèk debí na e situashon alarmante di COVID-19 na Kòrsou. Manera ta konosí Representashon di Hulanda na Kòrsou (VNW) siman pasá a konsehá tur hulandesnan ku no ta biba riba e isla, pa nan ta bai bèk Hulanda mas tempran. Esaki tabata di aber ku situashon hopi difísil den hospital CMC. Fin di mart i e promé dianan di aprel e kantidat di hende ku ta kontagiá ku COVID-19 a subi drástikamente. Ku esaki e kantidat di hende ku Corona den hospital i den intensive care a subi. VNW a konsehá hulandesnan manera turistanan, stazjèrnan i studiantenan pa bai Hulanda bèk. Pa asina nan no ta duna peso riba sektor médiko di Kòrsou.
VNW a splika ku e no tin di aber ku hulandesnan ku ta inskribí na Kòrsou i ku ta biba aki, pero solamente pa hende ku ta bishitá e isla. VNW a splika ku ta toka entre dos mil i tres mil hende. VNW no tin sifranan di kuantu hende a kambia nan ticket pa bai Hulanda bèk mas trempan. VNW a duna di konosé ku nan no a haña hopi yamada di hende for di momento ku e yamada a wòrdu hasí.
Doño di organisashon Wereldstage na Kòrsou, Maarten de Jong, a bisa Ret Karibense ku entre 10 i 15 porshento di stazjèrnan a duna di konosé ku nan ke bai Hulanda bèk. Ku ta nifiká ku mayoria di e stazjèrnan a opta pa keda. Persona ku ta traha ku studiantenan hulandes na Kòrsou tambe a bisa ku no hopi studiante hulandes a disidí pa bai kas bèk mas tempran. Esaki ta konta pa turistanan hulandes tambe. Organisashon turístiko riba e isla a duna di konosé ku nan no a mira kantidat grandi di turistanan ku a kòrta nan fakansi pa bai Hulanda bèk.
Ku esaki por konkluí ku hulandesnan no a sigui masalmente e yamada di Representashon.
Den entrevista ku Ret Karibense un stazjèr a splika ku for di e momentu ku el a bin Kòrsou tabatin un konseho negativo pa biahe kaba. E ta splika ku e tabata prepará pa un situashon un tiki otro. El a komprendé ku Representashon di Hulanda a hasi un yamada. Na su opinion e yamada ta komprendibel. Pero e stazjèr ta lamentá esaki, pasobra e no tabatin gana pa sali for di Kòrsou mas tempran.