WILLEMSTAD.-Dr. Izzy Gerstenbluth a pasa riba e sifranan ku ta trata Covid. Ayera a realisá 2225 test i for esaki a resultá ku 52 ta kasonan positivo nobo. Tin un persona mas ku a fayesé di Covid i a saka 64 for di isolashon. Den hospital Curaçao Medical Center tin 38 persona interná di kua 16 ta den kuido intensivo. Gerstenbluth a mustra ku énfasis ku 16 ta e kantidat maksimo ku e departamentu di kuido intensivo di CMC por karga.

E epidemiólogo a duna di konosé ku mayoria hende interná den hospital i sigur esnan den kuido intensivo ta hendenan ku no  bakuná. Di e total di 88 pashèntnan ku a raporta últimamente ta 3 hende so ta ful bakuná, 86 no tabata bakuná ètòl. E variante Delta ta hopi mas kontagioso i ta posibel pa keda infektá ku Delta apesar di ta bakuná.

Dr. Gerstenbluth ta splika ku e mensahe prinsipal ta keda pa korda protehá no bo so, pero protehá bo sernan kerí. Bakunashon ta importante i sigur pa protehá esnan mas debil. El a komentá e situashon di Israel pa splika ku ounke e bakuna ta protehá hende kontra di hospitalisashon i di malesa mas grave, por mira ku e efektividat di e bakuna ta bahando segun tempu ta pasa. E bakuna ta traha, pero ku tempu su efektividat ta baha. E epidemiólogo a bisa ku ainda basta hende na Kòrsou no ta bakuná. Na mundu hopi hende no ta bakuna i komo konsekuensia di esei e vírus ta  sigui sirkulá.

Lesley Fer a mustra un bia mas riba medidanan ku ta na vigor. Entrante mayan 20 ougustus tur eksonerashon bieu pa ‘toque de queda’ ta bira inbálido, tur instansia i funshon vital ku mester di eksonerashon mester hasi petishon nobo via di e website www.kalamidat

Tene kuenta ku por dura 72 ora pa haña aprobashon. No ta permití pa niun evento òf aktividat por tin mas ku 100 bishitante. Mas detaye den edishon di EXTRA.